Republic Day vawi 73-na hman a ni

India danpui hman ṭan ni, Republic Day vawi 73-na chu nimin khan Mizoram hmun hrang hrangah hman a ni a, a hmanna pui ber Lammualah chuan zing dar 8-ah hman niin, Governor Dr Hari Babu Kambhampati-a'n hnam puanzar a pawt pharh.

Larsap hian hnam puanzar a pawh pharh zawhah parade contingent-te'n hnam puanzar chibai an bûk a chháng lêt. Parade-ah hian contingent paruk chiah an tel a, 2nd Assam Rifles, 38th BSF, 3rd Bn MAP, 5th IR, Mizoram Home Guards leh 1st Bn MAP Brass Band an ni. Parade commander chu 5th IR assistant commandant CS Lalrinzuala a ni a, second commander chu Aizawl North SDPO C Lalmalsawma a ni.

Governor chuan Mizoram mipuite Republic Day duhsakna chibai a bûk a; Indian Constitution-in a ngaih pawimawh - mi tin dikna humhim, zalenna vawnhim, dan hmaa intluktlânna leh inunauna a awm zelte chu mi tin mawh a ni tih hre thar turin mi tin a chah.

Dr Hari Babu Kambhampati chuan, hriat theih chinah kum kal ta chhungin pawi khawihna lian a thleng lo tih sawiin, "Police-te'n ralthuam leh ruihhlo tawlh rûk tibo turin an thawk zel a, kum 2021 chhung khan ruih theih thil cheng vbc. 51.56 hù, silai 39 leh silai mû 4,307 an man a, thubuai 16 an ziak lut a ni," a ti.

Kum 2021-22 chhungin Mizoram-Assam ramri-ah SEDP kaltlangin sipaite riahna tur bahrik eng emaw zat cheng nuai 82.66 sênga sak a nih thu sawiin Larsap chuan, "SEDP sum vbc. 2.23 hmangin Vairengteah company headquarters sakna tur ruahmanna pawm a ni tawh," a ti a; police station leh outpost tinah audio recorder awm telna CCTV vuah vekna turin cheng nuai 200 ruahman a nih thu a sawi.

Hripui léng karah pawh hmasawnna kawng zawh zel a ṭul thu sawiin Larsap chuan, hlawhtlinna thawk chhuak tura ṭan la zel turin mipui a sáwm a, "Covid-19 lêng a la tawp loh avangin sorkarin mipui himna tura ruahmanna a siamte chu khua leh tuite'n ṭha taka kan zawm a pawimawh," a ti.

Govenor chuan, Mizorama tlawmngai pawl te, kohhran te, mipui leh Covid-19 frontline worker-te'n hripui donaah sorkar an thlàwp ṭhat avangin lawmthu a sawi a, sorkar thawhpui zui zel turin a ngen a ni.

Republic Day vawi 73-na hmannaah hian chawimawina leh lawmmante hlan ni lo mah se, a dawngtute hming puan chhuah a ni a; Literatute & Education huangah VL Nghaka, Ramhlun South-in Padma Shri a dàwn dawn thu puan a ni bawk.

Nimina R-Day-a Governor thusawi ṭhenkhat

 Fire & Emergency Services-in kum 2021-a kângmei an ṭhelh vanga bungraw humhim zat chu cheng vbc. 860 vel hû a ni.

 Excise & Narcotics-in kum 2021-22 (30.11.2021 thleng)-in NDPS Act, MLP Act leh Mizoram Excise Act hnuaiah mi 1,804 an man a, thubuai 1,959 an ziak lut a, sorkarah Rs 71,15,245 an chhûng.

 Mizoram State Cancer Institute tihchangtlun nan SEDP kaltlangin cheng nuai 76.21, Civil Hospital, Aizawla Trauma Centre sak nan nuai 450, Civil Hospital, Lungleia Trauma Centre sak nan nuai 300 pek a ni.

 National Food Security Mission - Oil Palm Scheme tharthawh niin, Aizawl, Kolasib, Mamit, Serchhip, Lunglei, Lawngtlai leh Siaha district-ahte kalpui a ni a, ram hectare 6,730-a zauah khaw 197-a lo neitu mi 10,843-in oil palm chìn beihpui an thlak.

 Sub-Mission on Agriculture Mechanization scheme hnuaiah sorkarin cheng nuai 3,516.56 a dawng a, mimal leh lo neitu pawlte'n subsidy-a an lâk theih nan kháwl lei a ni.

 Kum 2021 chhungin off-season tomato thar aṭangin cheng nuai 597.50 hmuh a ni a, quintal 10,363.25 thar a ni. Off-season cabbage qtl. 11,951.20 thar niin, cheng nuai 262 thawh chhuah a ni.

 March 21, 2021-ah Lungsenah African Swine Fever hmuh a ni a, ASF vangin Mizoramah vawk 29,821 a thi a, chhungkua 9,461-in an tuar. Vawk 10,381 suat a ni bawk. ASF zangnadawmna atan sorkar laipuiah cheng vbc. 11.69 hû project thehluh a ni.

 Mizorama kum 2021-a sangha thar zat kum 2020 aiin 38%-in a tlem.

 Jal Jeevan Mission hnuaiah thingtlanga in 1,33,132 zinga 61,850-ah tui connection pek a ni. Nov. 30, 2021 thlengin Mizorama khawpui hrang hrangah PHE-in tui connection 1,06,130 a pe chhuak.

 Green Mizoram Day 2021-ah thing ṭiak 1,47,043 phun a ni.

 Kum kal taah SEDP hnuaiah thla 10 chhung atan MR-in P/S zirtirtu 59 leh H/S zirtirtu 157 lak a ni. Padhna Likhna Abhiyan hnuaiah Siaha, Lawngtlai, Lunglei leh Mamit district-a puitling ziak leh chhiar thiam lo mi 22,800-in an thiam.

 Sorkar college pathumah post graduate zirna tur thil ṭulte peih thawkhat a ni tawh.

 Kum 2020-21 atana LAD-in 15th Finance Commission kaltlanga a dawn cheng vbc. 93 chu VC tinah a sem tawh.

 MGNREGS hnuaia job card neite tan kum 2021-22 chhungin ni 78 inhlawhna siam a ni tawh a, job card nei mi 2,08,652 an awm.

 Kum 2020-21 chhungin BADP hnuaiah MHA-in Mizoram tan cheng nuai 2,731 a pawm a, sum hmuh aṭanga 50% chu hna 176 thawh nan pek chhuah a ni tawh.

 PAHOSS hnuaiah dilna 1,458 a lut tawh a, dilna 403 pawm niin, mi 11-in in an sa zo tawh. Lunglei, Champhai leh Kolasib-ah PAHOSS kalpui tum a ni a, Lunglei tan cheng nuai 400, Champhai leh Kolasib tan nuai 250 ve ve ruahman a ni.

 Kum 2021-22 chhungin PMAY-HFA(U) hnuaia in 1,380 ṭhiah niin, in 344 sak a ni tawh.

 Mizoramah industrial estate 14-ah industrial unit 285 a awm.

 MBOCWWB-ah kum kal taah inziak lut thar 1,629 an awm a, inziak lut tawh zawng zawng 63,936 an ni.