KHAWTHLIR

Medal dawng turin thlang
Delhi-a special police commissioner hna chelh mek David Lalrinsanga, IPS chu nimin khan New Delhi-a Republic Day lawmnaah Presidents' Medal for Distinguished Service dawng tura thlan a nih thu puan a ni. Award hi Delhi Police dinchamah hlan a ni ang.

SBI-in tanpui
State Bank of India chuan nimin khan Kulikawn West YMA hnenah oxygen concentrator an pe a, Covid-19 a pen hnuah YMA branch hnena oxygen concentrator an pek palina a ni. Thilpek hi SBI regional manager LP Lalchangkima'n a hlan a ni.

BSF-in khawl pe
Border Security Force (BSF) 60th battalion chuan tun hnai khan Borapansury damdawi-inah thisen enfiahna khawl (blood analyser) leh ECG khawl (Electro Cardio Graph) an pe a, an bunsak nghal. Khawlte hi 60th BSF commandant Vinay Yadav chuan a hlan a ni.

Court leh MZU-ah Republic Day
Nimin zing dar 8 khan Gauhati High Court, Aizawl Bench tualah Republic Day hman a ni a, judge Justice Michael Zothankhuma'n hnam puanzar a pawt pharh.Gauhati High Court judge dang pahnih Justice Nelson Sailo leh Justice Marli Vankung bakah, High Court-a officer-te leh home ṭhenkhat aiawhte an tel. Mizoram University campus-ah pawh R-Day hman a ni a, vice chancellor Prof. KRS Sambasiva Rao-a'n hnam puanzar a pawt pharh a ni.

Minister-in tlawh
Minister Dr R Lalthangliana chuan nimin khan ruihhlo ngaite enkawlna tura ruahman Jordan Centre, Seṭhawn a tlawh a, an dinhmun a en. Jordan Centre-ah hian thawktu 22 leh honorary worker 120 vel an awm mek a ni.

Aizawl Venglai-in tanpuina hlân
Aizawl Venglai Branch YMA chuan nimin khan Covid-19 vanga harsatna tâwk mek Sawleng khuaah ṭanpuina chi hrang hrang an hlan. Aizawl Venglai YMA hian buhfai, alu, tel leh ei tur dangte bakah, hripui laka invenna tur hmai tuamna leh kut tihfaina ṭhahnem tak an pe a ni. Sawlengah hian chhungkua 350 vel awmin, hripui vei mi 49 an awm mek a ni.