Champhai NGO-te'n Republic Day an boycott; Champhai ṭhalaite'n DC chhuak lo tura vengin a quarters bulah an riahchilh

Champhai District NGO Coordination Committee chuan nimin khan Republic Day an boycott. NGO-te hian Champhai DC Maria CT Zuali sawnna order sût phûta kawng hrang hranga lungawi lohna an lantir hnuah pawh nimin thleng khan Mizoram sorkar aṭangin thu dawn an la nei lo.

Champhai District NGO member-te chu Republic Day boycott-a duty turin nimin zing khan an thawk chhuak a, DC Complex páwn lam aṭanga R-Day lawmnaa tel turte chu an dang a ni. Republic Day erawh DC pisa tualah mi tlemtêin an hmang tho a, bawrhsap Maria CT Zuali'n hnam puanzar a pawt pharh.

Champhai DC aṭanga Maria CT Zuali sawn chhuahna thupek January 13, 2022-a tihchhuah a nih hnuah sawn chhuah tur DC-te chu Republic Day 2022 thleng an awmna ngaia awm turin sorkarin a ti a, chumi hun chu nimin khan a tàwp.

Champhai District NGO Coordination Committee member-te chuan Maria CT Zuali chu a chhuah an remtih loh avangin nimin aṭang khan a quarters bulah an inkulh a, Champhai a chhuahsan lohna turin zan riakin an veng a ni.

Champhai NGO CC secretary Muana Hangsing chuan, nimina Republic Day an boycott-naah DC Complex ni lo hmun dangah chetna an nei lo tih a tarlang a, "He kan nawrh huaihawt hmanruaa hman tum nia ngaih theih kuhva kudam hâl tumna awm anga rálkhêl dár vuak chungchangah NGO lamin hriat kan nei lo. Hetiang thil thleng a awm a nih pawhin vawiina NGO hmalakna nen sawi zawm chi a ni lo tih kan in hriattir a, NGO tihhmingchhiat tumna mai mai niin a lang," a ti.

Champhai DC Maria CT Zuali sawn chhuahna tur thupek sût tura sorkar an karnaa hmalakna tur Champhai District NGO-te'n an duan sa chu nimin thleng kha a ni a; hmalak zel an tum thu puang tawh mah se, he thu ziah lai thleng hian hma an lak zelna tur ruahmanna hriat a la ni lo.