Padma Shri dawng turin VL Nghaka thlan a ni

VL Nghaka (92) h/o Lalbiakveli (L), Ramhlun South chu Mizorama Hindi zirna leh tihhmasawnna lama a thawh ṭhat avangin 'Literature and Education' huangah Padma Shri 2022 dawng tura thlan a ni.

VL Nghaka hi kum 1930-a piang a ni a, tunah hian Ramhlun Presbyterian Kohhranah upa a ni mek. Kum 1954-ah Hindi Visharad zoin, Mizo zinga zo hmasa a ni. Kum 1976-ah M.A leh kum 1980-ah M.Ed. a zo leh bawk. School Education department-ah hun rei tak hna hrang hrang a thawk a, DIET, Aizawl principal a nih laiin kum 1991 khan sorkar hna aṭangin a châwl.

Kum 1954 khan Kawnpuiah Assam Hindi Prachar Samiti a din a, president hmasa ber a nih bakah, hun rei tak chhung president a ni a; AHPS hi Mizoram Hindi Prachar Sabha tih a nih hnuah pawh hun rei tak hotu ber a ni zui a, tunah hian adviser a ni mek.

Rambuai laiin kum 1966-1976 inkarah India sipaite leh MNF inkara ṭawng lettuah a ṭang ṭhin a; lehkhabu eng emaw zat ziak tawhin, chu'ng zingah chuan Hindi Grammer leh Hindi-Mizo Dictionary pawh a tel. Tuitla mi pathum a chhan chhuak tawh a, tuitlaa thi mi pakhat a chhar tawh bawk.

Kuminah hian Padma Vibhushan dawng turin mi pali, Padma Bhushan dawng turin mi 17 leh Padma Shri dawng turin 107 thlan an ni.