April 2020 - November 2021 chhungin kuhva rah cheng nuai 6,966.84 hû man; chhiah sang tak pein dan angin kuhva lâk luh theih

Kum 2020-21 aṭanga kum 2021-22-a November 2021 thlengin Mizoramah ram dang aṭanga dan loa kuhva rah lak luh man Customs department-a lut zat chu kg. 21,89,005 a ni a, Rs. 69,66,84,676 (nuai 6,966.84) hû a ni.

Customs hotute chuan, dan hnuaiah ram dang aṭangin kuhva rah lâk luh theih a nih thu an sawi a, chhiah pek ngai erawh a sàn thu an sawi.

Aizawla Customs department hotute hnen aṭanga thu dawn danin, ram dang aṭanga dan loa Mizorama kuhva rah lâk luh April 2020 leh November 2021 inkara kg. 21,89,005 manah hian thubuai (case) 227 ziah luh a ni a; case 227 zinga 138 chu Customs man niin, case 89 chu agency dang man a ni.

April 2020 leh November 2021 inkara kuhva man kg. 21,89,005 zinga kg. 15,96,954 chu Customs man niin, Rs. 52,91,68,415 hù a ni a; kg. 5,92,051 chu agency dang man niin, Rs. 16,75,16,261 hù a ni thung.

Kum 2020-21 chhung khan ram dang aṭanga lak luh kuhva rah kg. 10,80,026 man niin, Rs. 33,82,88,398 hù a ni a, case 148 ziah luh a ni. 2021-22 kum kal mekah November 2021 thlengin kuhva rah kg. 11,08,979 man niin, Rs. 35,83,96,278 hù a ni a, case 79 ziah luh a ni bawk.

Aizawla Customs hotute chuan, ram dang aṭangin dan hnuaiah kuhva rah lâk luh theih a nih thu sawiin, "Dan hnuaiah Customs-in phalna (permit) a pek hmangin lak luh theih a ni. Dan hnuaia lak luh a nih chuan custom duty (chhiah) 100% an chawi a ngai a, kuhva rah chu Myanmar rama chìn leh thar a ni tih finfiahna document an neih chuan custom duty hi 45% a ni thung," an ti.

Customs hotute sawi danin, custom duty 100% chu kuhva rah man ang zat chiah custom duty-ah an pek a ngai tihna a ni a, 45% chu kuhva rah man aṭanga 45% tihna a ni. Dan hnuaiah kuhva rah lâk luh a nih dawn chuan, Zokhawthara Customs officer-in phalna (permit) a pe chhuak thei.

Customs department chuan January 17, 2022 pawh khan Zobizz Online Services hnenah ram dang aṭanga kuhva rah lâk luh phalna a pe a, chumi ang chuan January 18, 2022 khan Zokhawthara Customs gate kaltlangin kuhva eng emaw zat lak luh a nia thu dawn a ni.

Aizawla Customs hotute chuan, kuhva rah bakah thil dang pawh Myanmar aṭanga dan anga la lut turin thil tih ngai a awm nual thu an sawi a, "Ei tur lam chi chu a him leh him loh endik a ngai a, endikna hmanruate chu sorkarin a dah tur a ni a, man power (thawktu) lam chu keini lam chan a ni," an ti.

Myanmar kaltlanga kuhva rah lâk luh tam ber chu Indonesia aṭanga lak a nih thu an sawi bawk.