Hunthar Venga kâng ṭhelhtu motor-te kâng ṭhelh turin an che chhuak thei lo

Nimin chhun dar 12 vel khan Hunthar Venga Rosiami in, chhawng hnih a kâng ral a, a chhaka Sailopari in pawh a kâng kai a, in chhung bungraw ṭhenkhat kâng chhe hman mahse chhiatna nasa zawk a thlen hmain ṭhelh mih a ni. Kângmei chhuahna veng, Hunthar Venga Fire Headquarter-a kângṭhelh motor-te an che chhuak thei lo.

Hunthar Veng khawtlang hruaitute hnen aṭanga thu dawn danin, in kâng chhâwng chung zawkah hian Rosiami te chhungkua mi pali an cheng a, gas bur pathum an lak chhuah hman tih loh chu bungraw dang zawng chu a kâng vek a ni. Chhâwng hnuai zawk chu a luahtu turte'n bungrua dah lut tawh mah se, an la luah lut hman lo.

In kâng awmna hi Fire Headquarter, Hunthar Veng aṭanga hla lo tê ni mah se, kângmei ṭhelh tura kângṭhelh motor kalte chu Dawrpui, Bawngkawn leh Khatlaa Fire Station-a mite a ni a, chhun dar 12:45 velah kângmei chhuahna thlengin, Sailopari in kâng ṭan an ṭhelh mit a ni.

Hunthar Veng khawtlang hruaitute chuan, an veng chhungah Fire Headquarter a awm reng laia kâng ṭhelh tura che chhuak an awm lo chu an lungawi loh thu Vanglaini an hrilh.

Hunthar Veng khawtlang hruaitute chuan, "Kan veng chhunga kawngpui sira lirthei dah ṭhinte chu Fire Hqtrs.-a duty-te chet chhuahna an dâl loh nan hma kan la ṭhin a, lirthei chehsak pawh kan nei fo. Fire Hqtrs. hnaihah biak-in pahnih a awm a, Pathianni inkhawmah pawh lirtheite chu kawng dala dah lo turin min ti ṭhin a, fire service kawng dâl lo turin kan siam remtir vek ṭhin. Chuti chunga a thlang lawka kângmei chhuakah an rawn che chhuak miah lo hi kan hrethiam lo hle," an ti.

Hunthar Venga Fire Hqtrs. an biaknaah, duty-te chuan emergency duty an nei lo nia an lo chhan thu leh driver an awm lo a, emergency-a che chhuak thei an awm lo nia an lo chhàn thu an sawi bawk.

Kângmei chhuahna hmun hi bialtu MLA C Lalmuanpuia, bialtu councillor John Zosangliana leh Aizawl DC aiawhte'n nimin khan an tlawh nghal a; MLA-in Rs 5,000 leh Aizawl DC-in Rs 3,000 an pe a, khawtlang hruaitute nen thil thlen dan leh chhawmdawlna pek dan tur an sawiho bawk.