Mizoramah Republic Day lawm a ni

Nimin khan Mizoram district tinah leh hmun dang ṭhenkhatah Republic Day vawi 73-na hman a ni. District headquarters-ah chuan bawrhsap hoin hman a ni a, hmun ṭhenkhatah chuan lawmman sem a ni.

Republic Day hi Lungleiah chuan DC Office tualah hman a ni a, bawrhsap Kulothungan-in hnam puanzar a pawt pharh a, 2nd Battalion MAP-in hnam puanzar chibai an bûk. Bawrhsap chuan, financial year 2021-22 chhungin Lunglei High Powered Committee-in line department pasarih kaltlangin project 37, cheng nuai 400 chuang man an thawk tih a sawi.

Lungleiah hian Swachh Survekshan Cleanliness Competition-a ti ṭhate hnenah lawmman sem a ni a; sorkar pisaah District Rural Development Agency office, market-ah Rahsi Veng, high school leh a chung lamah Pukpui H/S, hotel-ah Zotlang Tourist Lodge, damdawi-inah Lunglei Civil Hospital, vengah Salem Veng leh commercial area veng bikah Chanmari te pakhatna an ni.

Siahaah chuan zing dar 9-ah Circuit House kawtah hman a ni a, bawrhsap Kesavan R-in hnam puanzar a pawt pharh. Mipui an tel lo a, sorkar pisa hotute telin, 2nd MAP-in hnam puanzar chibai an bûk a ni.

Champhaiah pawh Champhai District NGO Coordination Committee-in an boycott karah zing dar 6-ah DC pisa tualah hman a ni a, páwn lam aṭanga tel turte NGO-te'n an dan avangin mipui tel loa hman a ni.

Champhaiah hian bawrhsap Maria CT Zuali'n hnam puanzar a pawt pharh a; thuchah sawiin, Champhai district-in hmasawnna hmel tam tak a hmu zel chu lawmawm a tih thu leh, dinhmun ropui zawk thleng turin Champhai district mipuiin theihna nasa tak an neih thu a sawi a; sorkar hmalakna thláwp chungin, mahni kutkêa ding thei tur leh sorkar puihna tel lo pawha ding chhuak thei tura insangmar zel turin mipui a sáwm.

Kolasib-ah chuan zing dar 7-ah DC Office tualah hman a ni a, bawrhsap Dr H Lalthlangliana'n hnam puanzar a pawt pharh a, sorkar department hrang hranga head of office-te leh tlawmngai pawl hruaitute an tel. Bawrhsap chuan, Kolasib district-ah voter 62,610 an awm thu leh mi 51,391-in Covid-19 vaccine dose khatna an lâk tawh thu a sawi.

Serchhipah chuan zing dar 9-ah DC pisa tualah Republic Day hman a ni a, bawrhsap Nazuk Kumar-i'n hnam puanzar a pawt pharh. Sorkar office-a hotu te, tlawmngai pawl hruaitu te, thuthar thehdarhtute leh fai intihsiaka lawmman dawngtute an tel a; R-Day pualin home, damdawi-in leh District Jail-ahte thilpek hlan a ni bawk.

Republic Day hi Lawngtlaiah chuan zing dar 8:30-ah Central YLA khelmualah hman a ni a, bawrhsap Dr Andrew H Vanlaldika'n hnam puanzar a pawt pharh.

Lawngtlaiah hian kum 2021-a UDPA buatsaiha Swachh Bharat Mission (Urban) hnuaia Lawngtlai khawpuia fai intihsiakna lawmman te, Covid-19 kaihhnawiha medical mi thawk ṭha chawimawina te, state level declamation contest-a Lawngtlai district aṭanga pakhatna dawngtu leh Republic Day badminton tournament-a lawmmante a sem a ni. R-Day pualin damdawi-in, home leh jail-ah Rs 2,000 ṭheuh hlan a ni bawk.

Mamitah chuan DC Complex-ah hman niin, bawrhsap Dr Lalrozama'n hnam puanzar a pawt pharh a, 4th IR police-te'n hnam puanzar chibai an bûk. Mamita veng, sikul, pisa leh restaurant fai thlante hnenah lawmman hlan a ni a; R-Day pualin District Hospital, District Jail leh Mamita home-te hnenah DC-in thilpek a hlan a ni.

Saitualah chuan Saitual College tualah hman a ni a, bawrhsap VL Hruaizela Khiangte-in zing dar 10-ah hnam puanzar a pawt pharh. 2nd IR police-te'n hnam puanzar chibai an bûk a, Mizoram Home Guards Band Party-in hnam hla an rem bawk.

Saitual Town Sanitation buatsaih fai intihsiaknaa pakhatna ṭheuhte lawmman sem a ni a; Sihfa VC, Saitual SP office, Keifang Presbyterian English School leh Green Hills Hotel, Keifangte chu fai bera thlan an ni. R-Day pualin Hlimna In (Girls Home) leh Saitual Hospital-ah thilpek hlan a ni bawk.

Khawzawlah chuan zing dar 7:30-ah Republic Day hman a ni a, bawrhsap CC Lalchhuangkima'n hnam puanzar a pawt pharh a, 2nd IR police-te'n hnam puanzar chibai an bûk a chháng lêt.

Kum 2021-a UDPA department-in fai intihsiak a buatsaiha ti ṭhate hnenah lawmman hlan a ni. Khawzawl Dinthar Veng, Khawzawl M/S, District Education Officer pisa, Khawzawl Hospital, Hahdamna Hotel leh Vengthar Bazar-te chu fai berah thlan a ni.

Hnahthialah chuan chawhma dar 10-ah HBSC Ground No. II-ah Republic Day hman a ni a, bawrhsap R Lalremsanga'n hnam puanzar a pawt pharh a, police-te'n hnam puanzar chibai an bûk.

Hnahthial khawpuia fai intihsiaknaa ti ṭhate hnenah lawmman hlan a ni a; Model Veng, KVK office, Hnahthial P/S-IV, Hnahthial H/S leh Khawhri-te chu fai bera thlan an ni. HSLC 2021-a pariatna Jonathan Lalhruaitluanga leh MSW gold medalist H Lalvenzuali te, faina ziak ṭha Kailawn chanchinbu hnenah chawimawina leh lawmpuina hlan a ni bawk.