Covid-19 vangin mi 591 thi tawh

Nimin khan tlai dar 5 thlengin Mizoramah Covid-19 vangin mi pakhat a thi a; January 25, Thawhlehni zan khan mi pathum an thi bawk. Mizoramah hripui vangin mi 591 an thi tawh a, kumin January thla bikah mi 45 an thi tawh.

January 25, Thawhlehni khan Damvela (87), Chanmari West chu Covid-19 a vei tih hmuh a ni a, State Referal Hospital panpui a nih laiin zan dar 6:20 khan kawng lakah a thi. Zan dar 6:25 khan Lalberchama (76), Khuangpuilam, Kolasib chu SRH-ah a thi a, hripui a vei tih January 19, 2022 khan finfiah niin, a tuk January 20-ah khan SRH-ah dah luh a ni. Natna dang nei tel ve ve an ni.

Thawhlehni zan vek dar 11:30 khan Saptawna (81), Darzo, Hnahthial district chu hripui vangin an inah a thi. Covid-19 positive a ni tih January 25 khan hmuh a ni a, a hnu lawkah a thi a ni.

Nimin zing dar 2:20 khan Lalbuatsaihi (58), Dawrpui, Aizawl chu Aizawl Civil Hospital-ah a thi a; natna dang nei tel a ni a, a thih hma, January 26 vekah Covid-19 vei a ni tih finfiah a nih thu sorkar thuchhuakin a tarlang.