January 25, 2022-a positivity rate 25.90%

January 25, Thawh-lehni khan Mizoramah Covid-19 vei mi 1,756 hmuh chhuah a ni a, positivity rate 25.90% a tling. Nimin khan hripui vei dam tawh mi 633 chhuahtir an ni a, Covid-19 vangin mi pakhat a thi.

Covid-19 vei Thawhlehnia hmuh chhuah tharte chu mipa 770 leh hmeichhia 986 an ni a, RT-PCR hmanga hmuh 128, TrueNAT hmanga hmuh 58, RAT hmanga hmuh 1,546 leh FIA hmanga hmuh 24 an ni. Mi 1,756 zinga mi 1,092-in symptom an nei a, mi 664-in symptom an nei lo.

IPR tarlan danin, hripui vei mi 20 aia tam hmuhna Aizawlah veng 13 leh Aizawl pawn lamah khua/veng pali a awm a; hmuh chhuah tamna ber Dawrpui Vengtharah mi 57 hmuh a ni a, Aizawl pawn lama hmuh tamna ber Phuldungseiah mi 54 hmuh a ni.

Lengpui Airport-ah RAT hmangin state páwn aṭanga rawn lut zinga mi 16 Covid-19 positive hmuh chhuah a ni a, screening point dang - Kanhmunah pakua leh Tuivaiah mi pathum hmuh a ni bawk.

Sample endikna district 11 zingah positivity rate 10% aia a sànna district pariat a awm a, a sànna ber Aizawl district-ah 38.96% a tling.

Nimin tlai dar 5 thleng khan hripui vei dam tawh mi 633 chhuahtir an ni a; district tina chhuak zat chu - Aizawlah 154, Lungleiah 144, Khawzawlah 95, Mamitah 80, Hnahthialah 55, Serchhipah 47, Siahaah 17, Lawngtlaiah 15, Kolasib-ah 13, Saitualah 12 leh Champhaiah pathum a ni.

IDSP record angin, Mizoramah Covid-19 vei 1,64,126 hmuh chhuah a ni tawh a, mipa 78,206 leh hmeichhia 85,920 an ni a, mipa aiin hmeichhia 7,714-in an tam zawk. Nimin tlai dar 5 thleng khan mi 1,52,367 (93.84%) chhuahtir an ni tawh a, mi 591 (0.36%) thi tawhin, enkawl mek mi 11,168 (6.80%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,64,126 chu mi 1,000 zelah hripui vei mi 149 an awm ang a ni a; mi 1,00,000 zela Covid-19 vangin mi 53 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 25, 2021 thlenga swab sample endik tawh 16,37,719 aṭanga RT-PCR hmanga endik zat percentage chu 20.71 a ni a, RAT hmanga endik zat chu 73.51% a tling.