Serchhip MJA-in inkhawmpui an hmang

Mizoram Journalists' Association (MJA), Serchhip District chuan January 25, Thawhlehni tlai khan Serchhip Press Club-ah inkhawmpui an hmang a, MJA general headquarters president Zonunsanga Khiangte-in a hmanpui.

Inkhawmpuiah hian kum 2022-2024 chhunga Serchhip District MJA hruaitu tur thlan a ni a; president-ah C Lalhminghlua, vice president-ah C Ramengmawia leh treasurer-ah Lalremruata Ralte te an thlang.

Serchhip MJA vice president C Ramengmawia kaihhruai inkhawmah hian Zonunsanga Khiangte chuan, Mizoramah MJA member 193 an awm thu a sawi a, "MJA member zingah hian Covid-19 vei mi 32 an awm tawh a, member zat aṭanga chhûtin 16.58% a ni. Journalist-te hi thuthar zawnga hmun hrang hranga kal, mi chi hrang hrang dàwrtu kan nih avangin hri kai kan tam pawh hi thil mak a ni lo," a ti.

MJA President chuan, MJA member-te chu eizawnna avanga pawl pakhat a awm khawm an nih avangin khawi district-a mite pawhin inpawhna ṭha tak an neih thu sawiin, "Journalist hna hi senior avanga inthlahdah ngawt theih a ni lo," a ti a; journalist chuan thil thleng tharte ngaihtuah a, mipui tana ṭan an laka an inchher hriam zel a ṭul thu a sawi.