FES Director-in kâng ṭhelh a sawifiah

Nimina Hunthar Venga in kâng leh Fire & Emergency Services (FES)-in an ṭhelh dante FES director C Lalthanmawia chuan a sawifiah a; Hunthar Venga FES Hqrs. Office chu fire station awmna a nih loh thu leh mamawha hman tur (standby) kâng ṭhelh motor dah nan hman a nih thu a tarlang.

FES Director tarlan danin, nimin chhun dar 12:25 velah Hunthar Vengah in a kâng a, chhun dar 12:27-ah Aizawl Fire Station-in ERSS aṭangin first fire call an dawng a, chhun dar 12: 29 velah a hmun panin kang ṭhelh motor che chhuakin, dar 12:38 velah a hmun an thleng a ni.

In kâng chu kawngpui aṭanga ft. 80- 90 vela hláa awm a nih thu sawiin C Lalthanmawia chuan, "Fire tender hi a bul hnai têah a thleng thei lo a, kâng ṭhelhna tui pipe pathum zawm a ngai a. Fire party an thlen hian Pi Rosiami in hi a alh nasa hman tawh a (fully developed stage a ni tawh), a bul hnai bera in ding semi RCC building hi a kan chhiat hmain ṭhelh hman a ni," a ti.

FES Director tarlan danin, Aizawlah fire station panga - Aizawl FS, Khatla FS, Kulikawn FS, Bawngkawn FS leh ITI Veng FS-te a awm a; Aizawl FS bakah, Khatla FS, Bawngkawn FS, Kulikawn FS leh FES Hqrs aṭangin fire tender pakhat ṭheuh nen an chhuak. Hunthar Venga mi chu FS ni loin, FES Hqrs a ni a, standby-in fire tender dah nan hman a ni.

Director chuan, Hunthar Venga in kâng chu pawi an tih thu sawiin, "Dy SP, FES pawh a hmunah tirh nghal a ni a, FES staff-te inthlahdahna leh fel tawk lohna a awm leh awm loh enfiah tura tih a ni. FES inthlahdahna leh fel lohnate hmuh a nih chuan dan angin departmental action lak a ni ang," a ti.