Covid-19 vei mi 9 hmuh belh laiin Vei ṭhin mi pariatin an vei tawh lo
Zoram Medical College (ZMC) Covid-19 Laboratory-ah June 17, Nilaini khan Covid-19 hripui vei mi pakua hmuh chhuah leh a ni a; heti hian Mizoramah hripui vei mi 130 an awm tawh. Hetih lai hian, June 1, 2020-a Covid-19 vei hmuh chhuah mi 12 zinga mi pariat chuan hripui an vei tawh lo.
June 17, Nilaini khan ZMC, Aizawl, Lawngtlai, Lunglei, Mamit leh Siaha aṭanga swab sample an dawn zinga sample 508-te ZMC laboratory-ah endik a ni a; chu'ng zinga mi 499-in Covid-19 an vei lo a, mi pakua - mipa pathum leh hmeichhia parukte erawh chuan an vei thung.
Hripui vei hmuh thar mi pakuate hi Delhi leh Haryana aṭanga lo haw mi pali ve ve leh Maharashtra aṭanga haw mi pakhat an ni a; Siaha district leh Lawngtlai district mi pali ve ve leh Lunglei district mi pakhat an ni a, kum 19 aṭanga 32 inkar bakah, naupang kum 1 leh kum 10 mi an tel a ni. Quarantine facility-a awm lai vek an ni a, an taksaah harsatna an nei lo (symptom a lang lo).
Hetih lai hian Health & Family Welfare minister Dr R Lalthangliana chuan, Zoram Medical College / State Referral Hospital-a Covid-19 vei enkawl mek zinga mi pariat chuan Covid-19 an vei tawh lo tih finfiah a nih thu a sawi.
Health Minister sawi danin, Covid-19 vei zinga tun hnaia negative result nei thar mi pariatte chu hripui an kai tih June 1, 2020 zana hmuh chhuah zinga mi, Kolasib district mite an ni a; anni hian Covid-19 an vei tih hmuh chhuah a nih lai pawhin an taksaah harsatna an nei lo (symptom a lang lo). ZMC-a enkawl an nih chhungin an swab sample endik hnuhnung pahnihah an negative ve ve avangin Covid-19 vei tawh loa puan an ni.
Mi pariatte hi rapid antibody test (RAT) hmangin endik leh an ni ang a, non-reactive chuan State Referral Hospital aṭangin chhuahtír an ni ang.
SRH-ZMC Covid-19 Bulletin tarlan danin, nimin thleng khan State Referral Hospital (SRH)-ah hripui vei mi 47 enkawl an ni a; chu'ng zinga mi pariat, Covid-19 an vei tawh lo tih hmuh chhuahte chu vawiinah damdawi-in aṭanga chhuahtir tum a ni.
SRH-ah hian Covid-19 vei mek zinga pakhat chu ICU-ah enkawl mek a la ni a, a dinhmun a ngai rih a, ngaihtuahawm a ni lo. Hripui vei dangte chu Isolation Ward-ah an awm a, harsatna lian tham nei an awm lo. SRH-ah hian nimin khan Covid-19 vei rinhlelh thilah mi pahnih dah luh thar an ni a; chu'ngte nen chuan SRH-ah hian hripui vei tih finfiah ni lo mi 13 an awm mek a ni.
Heti hian June 17, 2020 thlenga Mizorama Covid-19 vei hmuh chhuah tawh chu mi 130 an ni a; chu'ng zinga mi 121-te chuan an la vei mek a, mi pakuate erawh chuan an vei tawh lo a ni.