MPCC-in an V. President insawifiah turin an ti ; Insawifiah leh sawifiah loh chu Hunin a la hril ang - R Lalzirliana

Mizoram Pradesh Congress Committee (MPCC) hnuaia Disciplinary Action Committee (DAC) chuan an party vice president R Lalzirliana, Home minister ni bawk chu show cause notice an pe a, insawifiah turin an hriattir. Thuthar thehdarhtute'n an kawmnaah R Lalzirliana chuan, a insawifiah dawn leh dawn loh chu hunin a hril tur thu a sawi.

MPCC DAC hian September 11, 2018 khan R Lalzirliana hnenah hian show cause notice an pe a, insawifiah tura an duh point pathum an tarlang. Point pathumte chu September 14, Zirtawpni tlai dar 3 hmaa party mipuite hriat theih tura sawifiah turin an hriattir a; hun tiam chhunga insawifiahna dawn a nih loh chuan a ṭul angin a chungah disciplinary action lak a nih tur thu an tarlang.

R Lalzirliana chuan September 6, 2018-ah Vanglaini leh Mizo Aw chanchinbuah Ṭawi bialah MNF-in candidate atana an sawm thu an chhuah vanga show cause notice dawng a nih thu a sawi a, "Vanglaini chuan min lo bia a, ka sawifiah a ni. Mizo Aw chuan a ngial a nganin an chhuah a, ka thu engmah an la ve lo thung. Hei hian ka chungah thil dik lo taka tih tum an awm tih a tilangin ka hria," a ti.

Chanchinbu chhuah ní hian DAC-te ṭhukhawmin, a hnuah a ina an kal thu sawiin R Lalzirliana chuan, "Party dangin eng emaw siama inchotuahna an siam theih thu leh, a hminga vice president ka nih anga engmah min zawtfiah hmasa loa an ṭhukhawm nghal ringawt chu ka lungawi loh thu ka lo sawi a ni," a ti a; DAC chuan Congress Bhavan-ah September 10-a insawifiah turin an ti niin a sawi.

MPCC Vice President chuan, September 10-ah insawifiah tura a inbuatsaih thu sawiin, "Hemi ni hian DC leh SP-te kokhawmnaah Chief Minister-te nen thusawi tur kan lo nih avangin ka kal dawn a, R Vanlalvena, MLA ka phone a, CM-te nen programme kan neih thu leh hemi kar Zirtawpniah ka sawifiah tur thu ka hrilh a, 'Ka lo sawi a nge' a ti. R Vanlalvena hian a lo sawi turah ka ngai," a ti.

R Lalzirliana chuan, insawifiah tura a intiam hun pawh a thlen hmaa show cause notice pek a ni chu a lungawi lo hle tih sawiin, "Kan party kan inlungrual loh chuan sorkarna kan chelh zo lo ang tih hi kan hotupa leh thusawitu tam berin an sawi ṭhin. Ka sawifiah hun tura ka tih pawh a thlen hmaa show cause notice-in min déng hi ka lawm lo khawp mai," a ti a; DAC-te thil tih dan chuan inlungrualna lam a kâwk lo tih a sawi.

Congress party sorkarna atan theihtawp a chhuah ṭhin thu sawiin R Lalzirliana chuan, "Ka hun ṭha zawng zawng Congress party tan ka hmang zo a, hetiang hian kan awm ve a ni. Kha'ng laia kan sorkarna tura rawn lang ve reng reng lo, tute nge pawh kan hriat lohte'n kan chunga hleilen an han chhuah thei ta mai hi fuihtu awm lo chuan an tih ngam ka ring lo. Ka lawm lo tak zet a ni," a ti.

Vanglaini palai zawhna chhangin R Lalzirliana chuan, show cause notice a chhan dawn leh dawn loh chu hunin a la hril tur thu a sawi a ni.

R Lalzirliana sawifiah tura an phûtte
ª Vanglaini, Sepetember 6, 2018 chhuaka MNF Nomination Committee September 4-a ṭhukhawm chuan MNF ticket-a Ṭawi biala ding tura ruahmanna an siam leh sâwm tura an sawi che hian party boruak a tichî-âi hle.
ª Mizo Aw, September 6 chhuakah Ṭawi bial hi Pu R Lalzirliana tan an dawh âwl tih lo chhuakte leh
ª MNF party hotu pawimawh tak tak hnen aṭanga MPCC Vice President election puan veleh MNF-a zawm dawn tih an sawi ṭhinte.