Bru-te'n Union Home Minister-ah ADC an dil

Mizoram Bru Indigenous Democratic Movement (MBIDM) tih invuahte chuan September 10, 2018 khan Union Home minister Rajnath Singh hnenah memorandum an thehlut a; Mizorama Bru-te tan autonomous district council siam turin an ngen.

MBIDM-in an memo­randum-a Mizorama Bru-te awm ṭan dan leh dinhmun an ziak lang a; 'Bru hnam zinga rawngbawlna' tih Upa Thangzawna ziahah chuan, Bru-te chu Mizoramah hmasang aṭanga lo awm tawh an nih thu ziah a nih thu tarlangin, "Reang (Bru)-te chu Mizoram leilung fa, indigenous tribal tih a tichiang a, Mizote an awm hma pawhin Bru-te chu an awm tawh a ni," an ti.

Sebastian karotemprel leh Deepali Danda te ziah, 'The Tribes of North East India' tihah pawh Reang-te chu Mizoram mi dik tak an nih thu a chuang niin an tarlang a; Mizoram mihring zat aṭanga 10% chu Bru niin an tarlang bawk.

MBIDM chuan, October 1997-ah Mizote leh Bru-te inkarah buaina a chhuah avangin Bru sang tam takin an in an tlanchhiatsan nia sawiin, "Aizawl district-a khaw 20 aṭangin Bru-te chu Tripura-ah an tlanchhia a ni," an ti a; tunah hian Bru 35,000 chu North Tripura district-a Kanchanpur leh Panisagar sub-division huam chhunga relief camp pangaah an awm mek tih an tarlang.

Tripura relief camp-a Bru-te dinhmun chu a chhiat thu te, sorkar laipui aṭanga chhawm­dawlna an dawn mek rualin, a tam tâwk loh thute an ziak a, "Kum 20 chhungj kan tawrh tawhnate hriain, kan thil phût - Constitution of India-a Sixth Schedule {Article 224(2) leh 275(1)} hnuaiah Mizo­ram khaw­tlang lamah hian autono­mous district (ADC) min siamsak turin kan ngen a ni," an ti.

MBIDM memorandum-ah hian an president GB Herbert Reang, general secretary Philip Apeto, vice president Lalfam­kima Apeto leh head of relief deparment Paritosh Chorky ten hming an ziak a ni.

Bru ADC tana MBIDM demand area
EAST: Tumpanglui-Tuidam Road kawng, Saipuilui, Setlak, Khamṭhuam, Tuirum, Khawhnai, Teirei Forest leh Avapui thleng.
WEST: Avapui aṭangin Mizoram hmarthlang lamah Bangladesh ramri thleng, Tuipuibari, Khantlang, Zomuantlang leh Tumpanglui thlengin.
NORTH: Tumpanglui aṭanga ṭanin, East leh West ramri atana an tih pawhin.
SOUTH: Avapui aṭanga inṭanin, Bangladesh ramri thleng.