Aizawlah Siktuithiang Kût hman a ni

MHIP General Head­quarters leh Art & Culture department huaihawtin nimin khan Lammualah Siktuithiang Kût hman a ni a; Art & Culture minister R Romawia khuallian niin, minister Vanlalawmpuii Chawngthu pawhin a hmanpui.

R Romawia chuan, Mizo hmeichhiate insuih­khawmna atana Siktui­thiang Kût buatsaih a ni chu lawmawm a tih thu a sawi a; Mizo hmeichhiate'n mipate lakah himna an mamawh tih sawiin, "Himna pe thei tur chuan Mizo mipate'n ṭan kan lak thar a ngai," a ti. Hmeichhia leh mipa intluktlanna turin sorkarin hma a la mek zel nia sawiin, "Iinthlanna chi hrang hrangahte pawh hmeichhe tan hmun siam belh zel tum a ni," a ti bawk.

Art & Culture director R Hmingthanzuala chuan, Siktui­thiang lâm chu Mizote Kristian nih hnua piang a nih thu sawiin, "Kan hnam làm dangte aia naupang deuh ni mah se, Zo nun ze mawi - tlawmngaihna, rinawmna, taimak­nate leh Zo hnahthlak inpumkhatna atan leh kan hnam zepui vawn nun zel nan i hman ṭangkai ang u," a ti a; Siktuithiang Kût chu MIzo hnam zia humhalh leh vawn himna atan hmanraw pawimawh a nih ngei a beisei thu a sawi.

MHIP Gen.Hqrs. president Saipuii pawhin thu sawiin, "Kan tu leh fate'n kan hnam zai leh lâm an chhawm nun zelna atan Siktuithiang Kût hi buatsaih a ni a, a vawi khatna atan Siktuithiang Kut kan hmang thei hi a lawmawm hle a ni," a ti.

Siktuithiang Kûtah hian Aizawl district-a MHIP branch 56 an tel a, Siktuithiang lâm ṭum thum an entir bakah, zaipawl leh mimal zaite ngaihthlak a ni.