MLA inthlanpuiah Zo hnahthlak ni lo ; Candidate siam tum loh vangin lawm

13th September, 2018

Zoram Peoples' Movement (ZPM) office bearer-te nimina an pisaa ṭhukhawm chuan resolution an pass a; NGO Coordination Committee-in a ngen angin, Zo hnahthlak dik tak ni lo chu MLA inthlan lo awm turah candidate-a siam an tum lo chu lawmawm an tih thu an tarlang.

ZPM resolution chuan, kumina inthlanpui awm turah ZPM-te lungrual taka an inbuatsaih thei chu lawmawm an tih thu sawiin, "Mipui beisei sorkar kalphung thar a lo ding ngei dawna a lan avangin lawmawm kan ti," a ti a; chief ministerial candidate atana Val Upa Council-in an thlan Lalduhoma chu lungrual taka an thlâwp thu puang nawnin, "Sorkar thar lo piang turah chief minister ni ngei turin theihtawp chhuah zel kan tum," an ti.

ZPM Val Upa Council-te'n taima taka hna an thawk te, Political Affairs leh nomination ngaihtuahtu Caucus-te'n tluang taka rem an ruat leh, an thurelte lungrual taka an pawm thei zelte chu zahawm an tih thu, ZPM resolution chuan a tarlang a; sorkar kalphung thar - mipui sorkar din duhtu zawng zawngte chu inbáwl hrang lo a, ZPM-ah tel vek turin an sáwm a ni.

Nimin vek khan ZPM chuan thuchhuah siamin, Chalfilh constituency chhunga Khanpui-Tualbung road, NLCPR aṭanga sum hmuh hmanga laih mekin Lailak khaw thlawhhmá a paltlang avangin an sawhthing chìnna hmun a tichhia niin an tarlang a, "Kut hnathawktute’n a súr a sa hnuaia an thawh rah seng a hun dawn mek laia a thlàwna a luang ral mai tur hi pawi kan ti hle a ni," an ti.

ZPM tarlan danin, Khanpui-Tualbung kawng laihna tur hian Ministry of DoNER-in July 4, 2011-ah cheng nuai 197.21 a pe a, May 25, 2012-ah C Lalhluna, Ramhlun hnenah kawng laih hna pek niin, contract amount chu nuai 165.238 a ni.

Kawng chu March 31, 2017-a siam zawh vek tawh tur a ni tih sawiin ZPM chuan, "Kum 2012-a hna ṭan tawh tun thlenga zawh a la ni lo hi demawm kan ti a, kut hnathawktute kut durh pawh zah zo loa an thlai tihchhiatsak a ni leh zel hi a pawi tak zet a ni. 'Miretheite kan VIP an ni' titu Mizoram sorkar hian thlai luman a pe ngei turah kan ngai," an ti.