KHAWTHLIR

Free clinic
Mizoram Institute of Medical Education and Research (MIMER) leh State Referral Hospital-a thawktute chuan nimin khan Police headquarters-a Arya Mess-ah police officer-te hriselna a thlawnin an endiksak. MIMER leh Referral Hospital-te hian August 18 aṭanga September 1 chhung khan traffic police-te hriselna an lo endiksak tawh bawk.

Gas thleng lo
Mizoram Indane Distributors Association (MIDA) chuan thuchhuah siamin, Indian Oil Corporation Ltd. leh gas phurtute an inbiakrem theih loh avangin hmarchhak pumpuiah gas phurtute an nuar tih an tarlang a, "Gas a lo thleng thei lo a, mipui hriatthiamna kan ngen a ni," an ti.

Mamitah training
Mamit District Education Officer, RMSA leh SSA-te chuan nimin khan Mamit IPR conference hall-ah Data Collection on UDISE 2018-19, Post-NAS Intervention and School Safety Awareness tih thupui hmangin training an buatsaih a; Mamit district-a sorkar sikul leh mimal sikul (govt. aided)-a headmaster-te bakah, zirna lam office hrang hranga thawkte an tel.

Zo Hnam Chhan Ni
MSU Gen.Hqrs. chuan kum tina an tih ṭhin angin, September 14, Zirtawpni hian Zo Hnam Chhan Ni an hmang dawn tih an tarlang a; hemi ni hian Mizorama hnam dang sumdawngte chu dawr hawng lo tura chahin, "Dawr hawng an awm a, harsatna an tawh a nih chuan MSU-in mawh a phur lo ang," an ti. MSU chuan, kum tin September thla chawlhkar hnihnaah Zo Hnam Chhan Ni an hmang ṭhin niin an tarlang.

MUP fai hnatlang
Serchhip khawpuia Mizoram Upa Pawl (MUP) unit hrang hrangte chuan September 10, 2018 khan faina hnatlang an nei. Serchhip MUP-te hian faina hnatlang hi mahni unit ṭheuhah nei turin an inhriattir a, September 10 khan mahni huam chhung ṭheuhah khawpui chhunga MUP unit 14-te chu an hnatlang a ni.