MPF-in Political Education nei mek zel

Mizoram People Forum (MPF) chuan tunlai hian hmar lam tlangdung khaw hrang hrangah Political Education seminar an buatsaih a; nimin khan Khawruhlian Kohhran Hall-ah seminar buatsaihin, September 10-11 chhung khan Suangpuilawn khuaa kohhran hrang hrangah hun an hmang.

Nimina Khawruhlian Presbyterian Kohhran hall-a Political Education seminar-ah hian Khawruhlian khua kohhran pawl hrang hrangte leh tlawmngai pawlte aiawh an tel. Chawhmaah MPF leh political party-te 'Thawhhona Thuthlung' zirho chungchang MPF general secretary hlui Upa Lalramthanga'n a sawi a; chawhnuah MPF hmalak zel dan tur te, local forum tihchak dan tur te, political party-te nena thawhho dan tur leh inthlan ní-a hmalak dan tur leh Election Commission of India leh police-te nena thawhho dan turte a sawi a ni.

MPF hian September 10, Thawhṭanni zan khan Suangpuilawn khuaa kohhran hrang hrangah Political Education Campaign an nei a, September 11 chhunah Suangpuilawn Kohhran Centenary Hall-ah seminar an buatsaih bawk. Seminar-ah hian Suangpuilawn pastor bial chhunga khaw hrang hrang aṭangin kohhran hruaitute leh NGO aiawhte an tel a ni.

MPF general secretary Rev.Dr R Lalbiakmawia chuan, political party hruaitute leh mipuite nena thawhhona ṭha tak an neih chuan, kumina Assembly inthlanpuiah inthlanna zalen, thianghlim leh ṭha a awm theih ngei a beiseiawm tih a sawi.