YMA Rorel Inkhawma agenda tur thlifim
YMA-a rorelna sang ber dawttu, Central Coordination Committee (CCC) chu nimin khan Central YMA Hall-ah an ṭhu a, CCC meeting vawi 87-na a ni. Central YMA president Vanlalruata'n kaihhruaiin, member 181 an kal a; kumina YMA Rorel Inkhawm neih tura thu ngaihtuah tur (agenda)-te an thlifim.
YMA CCC-in October 19, 2018-a Rorel Inkhawm neih huna bûk turin YMA kumpuan atan - zirna uar tih te, ruihhlo do tihte leh, ram leh hnam humhalh tihte an thlang a; agenda dang atan YMA khawih pasarih leh sorkar khawih pathum an thlang bawk.
YMA Rorel Inkhawm agenda turte
YMA KHAWIH
1. Mizoram kohhran hrang hrangte'n ram leh hnam humhalhna kawngah thawhhona leh inpumkhatna ṭha zawk an neih theih nan CYMA-in hma la rawh se.
2. Thingtlang lama zirna a ṭhat zawk theih nan CYMA-in hmalak ni rawh se.
3. Mizo hnam incheina hi patent tura hmalak ni rawh se.
4. Mizo ṭawng humhalh kawngah CYMA-in hma la rawh se.
5. Zu leh ruihhlo do kawngah tun aia nasa leh chak zawka branch tinte'n hma kan lak theih nan CYMA-in hma la rawh se.
6. Sorkar aṭanga development fund hna thawh (i.e. link road, BADP, NEDP and other construction) hi 70% tala hna thawh a nih theih nan CYMA-in hma la rawh se.
7. Ration buhfai leh gas mipuite'n bûk dik leh tlinga kan lak theih nan CYMA-in chak zawk leh rualkhai zawkin hma la rawh se.
SAWRKAR KHAWIH
1. Mizo hmeichhiate'n hnam dang pasal (tribal-in non-tribal) an neihin, Schedule Tribe status hlihsakna tur 'Social Custom Bill' Mizoram Legislative Assembly-a pass a nih theih nan CYMA-in hma la rawh se.
2. National Register of Citizens (NRC) hi Mizoramah kalpui ve ni rawh se.
3. Champhai-Tahan (Myanmar) bus service tir turin sorkarin hma la rawh se.