Ei tur sâwngbâwl chungchang sawiho

ASSOCHAM, Ministry of Food Processing Industries (MoFPI), NABARD leh Mizoram University ṭangkawp chuan nimin khan Hotel Regency-ah 'Conference on Startups and MSMEs in Food Processing’ an buatsaih a, Governor Kummanam Rajasekharan-a'n a hmanpui.

Governor chuan, khaw­sak phung dang­lam vang te, châk lâk tur remchang leh sorkar policy vangtein Startups and MSME-te tan ei tur sawngbawlna lamah hmasawnna tur a tam phah tih sawiin, "Food processing industry hi India economy tana thawh hlâwk berte zing a mi a ni a, mi tam tak tan eizawnna a siam a, agriculture leh industry-te thlun zawmtu pawimawh tak a ni," a ti a; Mizoram chu thei leh thlai chi hrang hrangah a hausa a, food processing lamah a hma lam hun a ên thu a sawi.

Kerala-a agriculture kaihhnawih board hrang hrang hotute a biak tawh thu leh anni pawhin Mizoram food processing sector tichangtlung tura puih an inhuam thu sawiin Larsap chuan, "Food processing industry chu Mizoram tana sum lak luhna ṭha, ei bar intodelh kawnga hmalakna ṭha tak a ni. Conference-ah hian food processing-ah hmasawn turin eng harsatnate nge kan neih a, a huhoa hmalak dan tur kan rua­hman thei dawn a ni," a ti.

Khualzahawm, MZU vice chancellor Prof. KRS Sambasiva Rao chuan, food processing pawimawhna sawiin, "Mahni kutkawiha eizawngte food processing industry kalphung a hriattirin, a chawk phûr dawn. Technological and Innovation Park din turin state sorkar hnena ruahmanna kan thehlut tawh a ni," a ti a; Mizoram chuan thei, thlai, hmuihmer bâwl hlo leh pangparte bakah, thil in chi (beverage) hrang hrangah theihna sang tak a neih thu a sawi.