Kohhran leh NGO chungah MNF lawm Covid-19 veite dam ṭha turin duhsak
MNF Legislature Party (MLP) chu an leader Zoramthanga, chief minister hoin CM bangla tualah nimin chawhnu khan an ṭhukhawm a; thuchhuah an siamah, Covid-19 hripui dona kawnga kohhran leh tlawmngai pawl (NGO) leh mipuiin sorkar an ṭawiawmnaah lawmthu an sawi a, Covid-19 vei enkawl mekte chu an dam leh thuaina turin duhsakna an hlân.
MLP hian Covid-19 léng chungchang leh Mizoram dinhmunte an thlirho a; CM Zoramthanga kaihhruaina hnuaia hripui donaa sorkar hmalaknate lawmawm an tih thu leh, kohhran, tlawmngai pawl leh mipuite'n sorkar hmalakna
ṭha taka an ṭawiawm avangin lawmawm an tih thu an tarlang.
Covid-19 vei mekte an dam leh thuai theih nan duhsakna an hlân a, "An zinga mi pariat laiin damna changa damdawi-in naktuk (Zirtawpni)-a an chhuahsan thei tur hi lawmawm kan ti hle. An dam theih nana theihtawp chhuahtu doctor, nurse leh thawktu dangte inpekna leh ṭhahnemngaihna a lawmawm kan ti hle a ni," an ti.
Mizoram leh khawtlang a himna tura theihtawp chhuahtu task force te, police leh mi tlawmngaite inpekna avangin Mizoram a him zel an rin thu leh an inpekna lawmawm an tih thu an sawi a; "Pu Zoramthanga, CM-in Covid-19 donaa hmalakna hrang hrang senso leh bungrua mamawh hrang hrang inhawng taka min ngaihtuahsak ṭhin avangin lawmawm kan ti tak zet a ni," an tih rualin, báng loa ṭawng-
ṭaisaktu kohhran leh mipui chungah lawmthu an sawi.
MLP chuan, "Covid-19 donaa Mizo tlawmngaihna Zo nun mawi vul zelin, kan hnam ṭan rualzia leh inpumkhatzia lo lang zel hi ropui kan ti tak zet," an ti a; khawvel hriata Zo nun mawi pho chhuak zel turin mipui an ngen.
MNF MLA-te ṭhukhawm chuan Mizo mipuite chu Covid-19 avanga chiai mai lo turin an chah a, hripui dona kawngah lungrual taka ke pen tura sawmin, "A ṭul leh mamawh apiangte sorkarin a ngaihtuah zel dawn a ni," an ti.
MNF Legislaturte Party chuan, vawiina Rajya Sabha MP thlan turah, MNF candidate K Vanlalvena chu a tlin ngei theihna turin duhsakna an hlàn tih an tarlang bawk.