Ni 5 inkhung hnuah swab sample lâk tur

Health & Family Welfare (HFW) department chuan quarantine chungchangah thuchhuah an siam a; Mizorama inkhung hran hun chu ni 21 a nih thu leh, RT-PCR hmanga swab sample endik tura lak hun chu inkhung hran ṭan aṭanga ni nga ral hnuah a nih thu an tarlang.

HFW department chuan, Mizorama sorkar, community, hotel, home quarantine-a inkhung hran hun chu ni 21 chhung a nih thu leh inkhung hran chhungin Health department-in inkaihhruaina a siamte chu ṭha taka zawm tur a nih thu a tarlang a; mCOVID-19 leh Aarogya Setu-a application-ah in-register vek turin a hriattir.

Quarantine hun ni 21 chhungin RT-PCR swab test result chhuak hman ngei tura ngaih a nih thu sawiin Health department chuan, "Test result hre hmasa loin quarantine centre chhuahsan phal a ni lo. Amaherawhchu, ni 14 a ral tawh a, PCR test result a negative bawk chuan quarantine facility chhuahsan phal a ni. Rokhawlhna eng emaw vanga result chhuak hman lo a awm chuan quarantine centre bialtu Health official leh bialtu CMO-te inbe ráwnin an chungchang an rél fel ang," a ti.

HFW department tarlan danin, RT-PCR test tur swab sample chu quarantine centre-a an luh aṭanga ni nga ral hnuah lak tur a ni a, Covid-19 vei nena inhnîm hnai (close contact)-te chu an inhmachhawn/inkhawih aṭanga chhiara ni 5-10 inkarah sample lak tur a ni. Home quarantine-a awmte pawh an awm ṭan aṭanga ni 5-10 inkarah sample lak tur a ni bawk.