NEDP Campaign

Nimin khan Serchhip DC Conference Hall-ah NEDP Multimedia Publicity Campaign buatsaih a ni a, IPR director David L Thangliana khuallian a ni.

Campaign hi IPR deputy director C Lalnunkima'n a kaihruai a; David L Thangliana chuan, tunlai khawvelah media a ṭhang chak hle tih sawiin, "Thu leh hla tin mai hi ni tin a darh ur ur reng a, chu'ng thu darh zingah chuan sorkar chunga lungawi lohna emaw, department-te'n hna an thawh ṭhat loh chungchang emaw a tam em em a, thil chîk ngai lem lo mi tam tak tan awih maite a hlauhawm ṭhin. Chuvangin, IPR chuan sorkar department-te'n ram leh mipui tan hna tam tak an thawk a ni tih mipuiin an hriat theih nan hetiang hun hi kan hmang ta a ni," a ti.

NEDP Multimedia Campaign-ah hian Serchhipa V/C member te, YMA, MHIP leh MUP hruaitute leh chanchinbumite an tel a; Serchhip district-a department officer 10-te'n an department kaltlanga tun hnai kum 10 vel chhunga hmasawnna hna an thawhte an sawifiah a ni.