R Lalzirliana'n Minister aṭanga bânna a thehlut ; Congress party aṭangin ka báng lo - Zira

Home minister R Lalzirliana, Power & Electricity, Rural Development leh Prison changtu ni bawk chuan nimin khan chief minister Lal Thanhawla hnenah Cabinet Minister a nihna aṭanga bânna a thehlut. R Lalzirliana chuan, minister aṭanga bànna thehlut mah se, Congress party aṭangin a la chhuah loh thu a sawi.

R Lalzirliana hian nimin khan Congress Bhavan-ah thu sawiin, Cabinet Minister aṭanga a bânna a thehluh tur thu a puang a; thu a sawi zawhah Chief Minister's Office a pan nghal, Chief Minister a awm loh avangin a Private Secretary hnenah bânna lehkha a thehlut a ni. Bânna a thehluh hnuah official car-ah chuang tawh loin, a mimal car hmangin an a haw nghal.

Congress Bhavan-a thu a sawinaah R Lalzirliana chuan, an party Disciplinary Action Committee (DAC)-in show cause notice an pek chu chhan chi-ah a ngaih loh thu a sawi a, "Kha'ng lehkha kha chhàn ka tum lo. Ka thusawi zawh aṭang hian Hon'ble Minister ka nihna a tawp dawn. Party-ah chuan chhuah ka tum lo a, ka laka action lak tum ngawr ngawr an awm a nih chuan thuhran," a ti.

R Lalzirliana chuan, party-ah inpum­khat a ṭul tih sawiin, "Kan hotupain a sawi fo angin, kan inpumkhat loh chuan ṭha viau anga lang pawhin a tlin loh theih. Tute emaw nin viau neia hma kan la a nih chuan tam viau anga lan pawhin a tlak theih," a ti a; tute emaw hêk tuma phî buai phî buai ho chu vote huitu an nih ngai loh thu a sawi.

MPCC Vice President chuan, Cong­ress party tan rinawm takin, thâ leh sum leh pai sêngin rawng an bâwl tawh em, tih inen lêt a pawimawh tih sawiin, "Opposition kan nih lai pawhin kan phûr tlang viau em, khawi khawiah emaw kan zin kual em, kan party sorkar lehna atan kan inpe em tihte ngaihtuah a ṭul," a ti.

Eptu MLA an nih laiin an hotupain dinhmun sang tak a ken avangin Mizo­ramin a neih remna leh muanna vawnhim a nih theihna atan theihtawp a chhuah tih sawiin R Lalzirliana, "State rálmuang ber inti mah ila, a chhungah remna a awm loh chuan awmzia a awm lo. Helte kan bei a, helte hian min chhui let a ni. Sorkarna ropui takin kan siam leh a lawmawm hle," a ti a; sorkarna siam leh tura ṭhahnemngai turin an party mite a chah.

MPCC Vice President chuan, lung­awi lohna a neih vang emaw, an party President nena an inngeih loh vang emawa Cabinet Minister aṭanga báng tur a nih loh thu sawiin, "MLA chu mipuite tana hna thawh a ni. Ka bial mipuite'n district an duh a, kum 40/50 kal ta aṭang tawh khan. District pe thei tura min ngaih avangin ṭum li zet min thlang tling a ni," a ti.

Saitual bial aṭanga thlan tlin a nih hmasak berin Saitualin hmuhsit a hlawh hle tih sawiin Lalzirliana chuan, "Chakma bial tihte kan hlawh ṭhin. Kan zin dun ṭumin kan party President-in, 'Saitual bial hi zak loa min siamtu in ni a, heta ṭang hian development ṭan a ni ang. MNF-in district fuke kim loin an pe che u a, fuke kim kan pe ang che u' a ti a ni," a ti a; an party President thusawi chu bial mipuite'n an awih tih a sawi.

R Lalzirliana chuan, a bial mipuite chu 'Lal Thanhawla'n a tiam tawh a tihlawhtling lo ngai lo' tihah innghatin an phûr hle tih sawiin, "Tun thlenga district hi a la hlawhtlin loh avangin ka nihna aṭang hian ka báng. Min la duh ve a nih chuan party aṭangin ka báng lo. Mi thinchhia ka ni a, kan thil tih dik loah in mi ngaihdamna ka dil e," a ti.

CMO-a thuthar thehdarhtute'n an kawmnaah Chief Minister berin a tiam tawh avangin inthlan hnuhnung berah khan thlan tlin a nih chuan Saitual district tihpuitlin a tiam ve thu a sawi a, "Mahse, hei kan sorkar chhungin tihhlawhtlin a ni ta lo a ni. Bial mipuite ka zah em em a ni," a ti a; minister nih chu ni khat lek pawh thlakhlelhawm viau mah se, bial mipuite vangin bànna a thehluh thu a sawi.

R Lalzirliana hian Chief Minister hnena bànna a thehluhah hian Saitual district tihpuitlin a nih loh avangin thil tih hreawm tak ni mah se, banna thehlut lo thei loa a din tak thu a tarlang a, "I mi hriatthiamna ka ngen nghal bawk e. Party-ah erawh chuan lungrual taka kan thawhho zel theih ka beisei," tiin a ziak a ni.

Hetihlai hian Disciplinary Action Committee (DAC)-in R Lalzirliana hnena show cause notice an peka insawifiah tura an tih hun chu nimin tlai dar 3 khan a tawp a, he thuziah lai hian an hmalak dan kan hre lo. DAC hian an show cause notice-ah hian R Lalzirliana hi a insawifiah loh chuan a chunga disciplinary action lak a nih tur thu an tarlang a ni.