YMA-in ILP nei lo 873 an man chhuak

Central YMA ruahman angin, September 13, Ningani zan khan Mizo­ram pumah YMA branch hrang hrangin an huam chhunga hnam dang awmte'n Inner Line Permit (ILP) an neih leh neih loh an endik a, hriat theih chinah ILP nei lo hnam dang 873 an man chhuak. Hetih lai hian, police pakhat chuan ILP nei lo man zinga pakhat aṭang­in thamna sum lain a chhuahtir.

Police hotute aṭanga thu dawn danin, ILP nei lo leh felfai lo vanga hnam dang mante chu police station-ah thawn zel an ni. Hriat theih chinah Aizawl khawpui chhung bikah chuan mi 778 man an ni a; chungte chu - Aizawl Police Station-ah 297, Bawngkawn PS-ah 255, Kulikawn PS-ah 78, Vaivakawn PS-ah 93 leh Zonuam Outpost-ah 55 an ni.

Lunglei PS huam chhungah hnam dang ILP felfai lo 38 man an ni a, Serchhip PS-ah mi 19 leh Kolasib PS-ah mi 38 man an ni bawk a; Aizawl khawpui pawn lama man zat hi mi 95 an tling.

Hetih lai hian, Ramhlun South Branch YMA duty-te'n an veng chhunga hnam dang awm, ILP felfai lo an man chhuahte zinga pakhat chu police kuta an hlan hnuah police pakhat, Ramnghinglova'n thamna lain a chhuah a; Ramnghinglova hi nimin khan department-in an suspend nghal nia thu dawn a ni.

Ramhlun South Branch YMA secretary K Lalthlengliana'n Vang­laini palai a hrilh danin, Ramhlun South YMA duty-te chuan an veng chhungah ILP nei lo hnam dang pakua an man a, Bawngkawn PS-a an hriattir angin Bawngkawn PS motor Gypsy MZ-01 B-2952 hmangin an la a ni. Hnam dang pakua zinga pakhat chu Ningani zan vek khan an man leh nghal a, a chhuah theih dan an zawh chuan, police driver hnenah pawisa a pe a, a chhuahtir tih a sawi.

Police driver grade-II Ram­nghinglova hian hnam dangte chu Rs. 1,000 min pe ula, in chhuak thei ang, a ti a; Rs. 1,000 an neih loh avangin Rs. 500-a chhuahtir an dil a, police driver chuan a phal lo. Mahse, Rs. 650 a pe a, police driver chuan a chhuahtir ta a ni.

K Lalthlengliana chuan, thil awm dan chu Bawngkawn PS-ah an finfiah vek tih a sawi a, "Mi pakua kan thawn phei a, Bawngkawn PS-in mi pariat chuan an lo receive a ni," a ti.

ILP nei lo dap chhuah beihpui thlak chungchangah hian CYMA president Vanlalruata chuan, Ramhlun South YMA-in an man sa police pakhatin a lo chhuah chu pawi a tih thu sawiin, "Tuna mante pawh hi Court-in an chungthu a la rel ang a, tam tak chu an ram lamah thawn let an ni ang a, chu'ng hunah pawh chuan kawng lakah thlauh mai mai loin, push back ngei se kan duh," a ti a; YMA-in nasa zawka hma an lak dawn thu a sawi.

Central YMA President chuan, in saknaah emaw, hmun dang­ah emaw pawh hnam dang chhawrtute chu an mi chhawrte din­hmun hre chiang turin a chah a, "Kan vai chhawrte hi ILP an neih leh neih lohte hre chiang ila kan duh hle a ni," a ti.