CM-in NCC Battalion hawng

Lunglei Electric Venga 2 NCC Mizo Battalion chu nimin khan chief minister Lal Thanhawla'n a hawng a; Agri-Marketing & Training Infrastructure sak tur lungphum phûm nghal bakah, Skill Development Training Centre a hawng bawk.

Chief Minister chuan, NCC battalion din belh a ni chu India hmarchhak NCC enkawltute hma­lakna rah a nih thu a sawi a, "NCC hi sipaia lut duh­te tan inpuahchahna ṭha a nih avangin eizawnna zel atan a thil ṭangkai a ni. Sipaia luh zui zel tum kher lo tan pawh mahni nun invawnna kawngah leh khua leh tui tha nihna kawngah inzirtirna ṭha a ni," a ti.

Lal Thanhawla chuan, "Tuirial Airfield chu NCC Flight Training leh ṭul dang atana ruahman mek a ni a, flight simulator lei a nih tawh a, rei loteah flight training neih tan ṭum a ni," a ti a; NCC Air Wing chu India hmar­chhak pumpui tan a nih tur thu a sawi.

Skill Development Training Centre chung­changah CM Hawla chuan, "Agri-Marketing & Infrastructure pawh rua­hman anga din chhoh ngei ka duh. Heng hma­laknate hi ṭhahnem­ngaih­na tak tak in zui se, hman ṭangkai a nih loh chuan sum a luang ral mai tihna a ni," a ti.

Inkhawma tarlan danin, 2 Mizo Battalion NCC Lungleiah hian cadet 3,520 awm thei tura ruahman a ni a; district pali - Lunglei, Serchhip, Siaha leh Lawngtlaia college panga leh high school 14-a NCC cadet-te a enkawl ang. Kum thum chhungin ṭul leh mamawhte dah tum a ni a, Ministry of Defence chuan officer pahnih, JCO pariat leh NCO 18 a dah tawh a, Mizoram sorkarin civil staff a pe thung ang.

Agri-Marketing Centre sakna tur hian cheng nuai 1082.93 rua­hman a ni a, NABARD kaltlanga hmuh a ni. Skill Development Training Centre hawn tâk sakna tura sum ruahman chu cheng nuai 243 a ni a, sorkar laipuia ASIDE Scheme leh NEDP aṭanga hmuh a ni.