KHAWTHLIR

Praise On hlan
Synod Information & Publicity department (Synfo)-in KṬP branch-te rimawi hmanga intihsiak a buatsaih tur, Praise On 2018 chu nizan khan Mission Veng Kohhran Hall-ah Synod moderator Rev. F Lalrinnunga'n a hlan. Hlanna inkhawm hi Organising Committee chairman Upa Zonunmawia'n a kaihruai a, secretary Upa VL Muanchhana report a pe. Kumina Praise On hi beat group intihsiakna a ni dawn a, KṬP branch 56 aṭangin band 59 an tel dawn. September 18-ah ṭan a ni ang a, November 9-ah zawh a ni ang.

SSA hmanpui
Mizoram SSA Teachers Association sub-hqrs., Lunglei chuan Ningani khan Convention Centre, Lungleiah conference vawi hnihna an hmang a, MJA gen.hqrs. president Zonunsanga Khiangte-in a hmanpui. MJA President chuan, zirtirtu hna chu hna zahawm a nih angin zirtirtute chu zahawm leh rinawm, mi taima ni turin a chah a, "Zirtirtu zahawm lo nih hi a zahthlak a ni," a ti. Lunglei SSA TA-ah hian member 465 an awm a ni.

Damdawi sem
CodNerc leh Vitamin Angels-te chuan nimin khan Armed Veng South YMA Hall-ah nu, nau pai lai leh naupang kum 5 hnuai lamte tan a thlawnin damdawi (vitamin) an sem a, damdawi mamawhtu nau pai mi 10 leh naupang 53 hnenah an pe. Damdawi semna hun hi CodNerc chairman B Lalchhanzova’n a hmanpui a, Armed Veng South YMA hruaitute leh Local Council hotu­te'n an ṭawiawm a ni.

Thu leh hla kûtpui
MZP chuan nimin khan an pisa conference hall-ah 'Thu leh hla kûtpui' an buatsaih. Aizawl North College-a Mizo department assistant professor Rohmingthanga Ralte-in ‘Awithangpa chanchin leh a hlate’ tih paper a buatsaih a sawi a ni.

Tanpuina hlan
Tun hnaia Tripura-a Bru relief camp aṭanga Mizorama let Bru chhungkaw pahnihte hnenah nimin khan Kolasib DC Dr Arun T-in a pisaah chhawmdawlna sum a hlan. Bru chhungkaw pahnihte hi Lalnunfela leh Hriata te chhungkua an ni a, Meidum khuaah dah an ni. Chhungkaw pahnihte hi inremna thuthlung angin, kum hnih chhung fixed deposit-a dah turin Rs. 4,00,000 ve ve cheque hlan an ni a, housing assistance atan Rs. 1,50,000 phalsak an nih angin Rs. 25,000 ve ve pek an ni tawh. Heng bakah hian, kum hnih chhung thla tin Rs. 5,000 leh buhfai an dawng dawn bawk.