Vawiinah Aizawlah kawngzawh a ni dawn
Mizoram sorkara lumpsum grant-in-aid higher secondary school pakuate adhoc grant-in-aid dinhmuna hláng kai tura sorkar nawr nan vawiin hian Aizawlah kawngzawh a ni dawn.
Kawngzawh tur chungchangah hian Mizoram Govt. Lumpsum Grant-in-Aid Higher Secondary Association (MIGLAHSSA) leh khaw pakuaa Joint Students Union hruaitute'n Aizawl Press Club-ah thuthar thehdarhtute an kâwm a; "Managing Board, MIGLAHSSA leh Joint SU-te'n kan lo rel tawh angin, sorkara kan thil ngen chungchangah hlawhtlinna kan la hmuh loh avangin September 15 hian Aizawlah Chanmari kâwn aṭanga Vanapa Hall thlengin kawng zawh kan tum ta a ni," an ti.
MIGLAHSSA general secretary Lalfakawma chuan, kawngzawhah hian lumpsum aided HSS awmna khaw pakua - Phullen, Thingsulthliah, Sakawrdai, Zobawk, Farkawn, NE Khawdungsei, East Lungdar, West Phaileng leh Zawlnuam aṭangin Managing Board member te, zirtirtute leh zirlai a remchang ang an kal khawm dawn bakah, khaw pakua mi leh sa, Aizawla awmte an tel dawn thu a sawi.
Joint SU president hruaitute chuan, khaw pakuaa HSS-te chu kum 2005 hma lama din vek an nih thu leh kum 2008-ah lumpsum aided-ah dah an nih thu a sawi a, "Lumpsum fund hi sikul pakhatah kum khat atan Rs. 1,50,000 theuh pek a ni. Zirtirtute hlawh pangngai tak pek a ngai a, khawtlangin thla tin cheng tam tak an ngaihtuah a ngai. Sum hmuhna chu ni za inhlawhna a ni a, ni za inhlawhna hi a mumal lo tawlh tawlh a, khawtlang hruaitute tan a buaithlak ta em em a ni," an ti.
Lalfakawma chuan, "Kan dinhmun, kan harsatna hi kan sorkar leh Zoram mipui hian min hriatpui turin kan ngen tak zet a ni," a ti a; tunah chuan subject pakhatah zirtirtu pakhat chauh an awm a, adhoc grant-in-aid dinhmunah awm se chuan, subject tin chu zirtirtu pahnih ṭheuhin an vil thei ang a, zirlaite pawhin hma an sawn lehzual ngei an beisei thu a sawi.
Lumpsum HSS pakuate adhoc aided dinhmuna dah tura sorkar kar nan thla khat chuang sikul an lo khâr tawh bakah, an awmna khuaa sikul dangte pawh an lo dang tawh a, kawngpuite an lo dang tawh bawk. Khaw pakuaa HSS-ah hian academic session 2018-19 ah zirlai 850 vel an awm a ni.