Darbilhi Tea Processing Unit hawng

Darzo khaw rama thing­pui fe sawngbawl­na khawl bun thar, Darbilhi Tea Processing Unit chu nimin khan Agri­culture secretary Lal­hmingthanga'n a hawng.

Lalhmingthanga chuan, Darzo leh a chheh­vel khuain an hman ṭangkai theih tur tea factory din a ni chu a lawm­awm a tih thu a sawi a, "Thingpui chíngtu zawng zawngte'n ṭan la lehzual ula, in tu leh fate thlenga eizawnna ngêlnghet bul ṭanna atan a ṭangkai hle dawn a, Mizoram mai ni lo, ram páwn thleng pawha lâr turin ṭan in la dawn nia," a ti.

Darbilhi Tea Processing Unit hi MOVCD-NER scheme hnuaiah Mission Organic Mizoram leh One Organic Partnership ten an din a ni a; ni khatah thingpui fe kg. 320 a siam chhuah theih a, Orthodox tea siamna khawl dah niin, Green tea siamna khawl dah belh thuai tum a ni. Thingpui khawl aṭang hian organic tea chauh siam chhuah tum a ni a, organic certificate pe turin Ecocert India chu sorkarin a ruai tawh niin an sawi.

Darzo leh a chhehvel khuate hian kum 1933 vel aṭangin thingpui an chíng ṭan a, an thingpui chìn tam zawk chu Mizo­in ‘Zîksen’ an tih ang chi a ni.