Kar hnih awh Hindi Diwas khâr

Border Roads Organisation (BRO) hnuaia Project Pushpak-in chawlhkar hnih awh Hindi Diwas lawmna, September 1-14, 2018 chhunga an hman chu nimin khan Rajat Auditorium-ah khâr a ni a, khârna inkhawm hi Governor Kummanam Rajasekharan-a'n a hmanpui.

Governor chuan, Mizo mipui, a bikin naupangte’n Hindi Diwas lawmna phûr taka an chhim chu lawmawm a tih thu sawiin, "Sorkar laipuiin ram chhung leh pawna Hindi chawikang turin hma a la a. Hindi thiam hi inchhuanna thama ngaih tur a ni a, hnam dangte nena kan inlaichhinna a tiṭhain, ram danga lehkha kan zir emaw hna kan zawn hunah thui takin min pui dawn a ni," a ti.

Larsap chuan, Project Pushpak-te'n Mizoram ramria inkalpawhna kawng siam hna bakah, ṭhahnemngai taka Hindi chawikang tura hma an lakna chu fakawm a tih thu a sawi bawk.

Inkhawmah hian Project Pushpak chief engineer Brig. Birender Singh chuan tun hnaia Kerala state-a tuilian tuarte ṭanpui nan sipaite thawh khawm aṭangin Governor hnenah hian Rs. 1,50,000 cheque a hlan a ni.

Hindi Niwas chhung hian Project Pushpak headquarters-ah essay inziahsiak leh inelna hrang hrang buatsaih a a ni a; a khârna inkhawmah hian Hindi hmanga mipui hmaa thu insawi thiamsiak buatsaih a ni bawk.