Aizawl Traffic Jam Free Project zirho a ni

Transport department chuan nimin khan Vanapa Hall-ah NEDP hnuaia project an neih, Aizawl Traffic Jam Free Project chungchang zirhona an buatsaih a; Aizawla local council member te, Traffic police-te leh enforcement staff-te an tel.

Training hi Coordination Committee on Traffic Management hnuaia Working Group Committee chairman Lalbiakzama’n a kaihruai a; Transport joint director (Hqrs) R Lalrammawia’n 'Aizawl Traffic Jam Free' atana hmalakna hrang hrang a sawi. Resource person-te chu Transport director R Remmawia, Traffic SP H Ramthlengliana, AMC councilor R Lalbiakthanga leh IPR director David L Thangliana te an ni.

Resource person-te hian Aizawl Traffic Jam Free Project thil tum hrang hrang - khawpui chhunga lirthei che vel rang zawka an duhna hmun an thlen theihna tur te, petrol/diesel hman tlem te, public transport bus leh taxi hman uar te, pollution tihhniam te, khawpui hrisel zawk neih dan chungchang te, Mizoram (Regulation and Control of Vehicles Parking) (Amendment) Rules 2018 chungchangte an sawifiah.

Training-ah hian Working Group Committee chairman Lalbiakzama'n Aizawl Traffic Jam Free Project booklet a tlangzarh a ni.

Traffic Jam Free Project hmalakna
1. Awareness & Publication: Mipui zirtirna atan chanchinbu, local TV, hoarding, leaflet, bookmark, rally hmangin Aizawl traffic jam a ziaawm theih nan hmalak a ni a; zirlaite tan inhrilhhriatna hun buatsaih tum a nih bakah, YMA branch-te quiz-a inelna buatsaih tum a ni.
2. Capacity Training: AMC, Traffic police, enforcement staff, local council-te tan training buatsaih.
3. Traffic Equipments: Traffic police mamawh hrang hrang ngaihtuahsak.
4. Towing truck & enforcement: Aizawla lirthei dah sawn ngai hnûk sawn zung zung tur towing truck pali lei tura ruahmanna a ni a, enforcement duty-te tan TATA Sumo pakhat lei a ni.
5 Smoke Analayser: Aizawl boruak a thianghlim zel theih nan khawpui chhunga petrol pump 10-ah pollution endikna khawl bun a ni.
6. Garage numbering & site preparation: Local council-te nen ṭangkawpin lirthei nei zawng zawngte'n garage nei vek turin hmalak a ni. Veng hrang hrangah vantlang ram, lirthei dahna tura siam theih cheibawl tura hmalak a ni a, Ramhlun Vengthar leh Tuikual South-ah siam tum mek a ni.
7. Public parking: Lirthei dahna tur hmunpui Traffic Complex, Chaltlangah sak tura hmalak a ni. Zodin-ah Multi Level Car Parking leh Mizo High School Multipurpose Hall siam ṭhat a, a hnuai lam parking nana hman tum a ni.