Chaw ngheite test result la chhuak lo Niminah swab sample lak nawn a ni

Lungleia Ramthar Veng BCM biak-in hmuna community quarantine facility-a awm mek hmeichhe pakuate chuan June 6, 2020-a an swab sample lak tawh result chu nimin thleng khan an la hre lo. Hetih lai hian, nimin khan an swab sample lâk nawn leh a ni.

Lunglei aṭanga Vanglaini thu dawn danin, hmeichhe pakuate hian June 6-a an swab sample lak tawh chu ni 10 chhunga result an dawn loh avangin lungawi lohna lantirin, June 16 zing aṭangin chaw an nghei a, sorkar thuneitu lam nen an inbiak hnuah chaw nghei chu June 16 zanah an titawp.

Chaw an nghei chhan ber - swab test result chu nimin thleng khan an la hre ta chuang lo a; nimin tlai dar 4 vel khan Health department lam mite'n an swab sample an la nawn leh ta zawk.

Hmeichhe pakuate zinga mite biakpawh an nih hian an swab sample lak hmasak chu huphurh tak chungin result an ngaichâng reng a; thuneitu lam aṭangin, 'Result ngaihchàn mek a ni,' tih bak an hre lo. Chutih mek lai chuan, swab sample lâk ṭhat leh tur thu an dawng zui ta a ni.

Swab sample hmasa zawk result hriat hmaa swab sample lak nawn a nih chhan hi Lungleia Health department official-te chuan an sawi thei lo a; Vanglaini thudawnnain a sawi danin 'Thuneitu sang zawk' aṭangin sample la nawn tura hriattirna an dawn an bawhzui a ni.

Tarlan tawh angin, Lungleia Ramthar Veng BCM biak-in hmunhmaa khung hran mek hmeichhiate hi Delhi aṭanga haw niin, June 1-ah khung hran ṭan an ni a; an zinga pakhat chu Covid-19 a vei tih hmuh chhuah a nih avangin June 6 khan mi dang pakuate sample lak a ni. Ni 10 hnu, June 16 thlenga result an hriat loh avangin, result hriat thuai theih beiseiin June 16 khan chaw an nghei ṭan a ni.

Bialtu MLA leh sorkar official lamin an swab sample chu rang taka endik a, an dinhmun hriattir vat tura hrilhin, chaw nghei tihtawp tura an thlèm avangin chaw nghei chu an titawp a ni.