Zira bânna CM Hawla'n a pawm dawn ; NLUP khinna Court-in thu tlinga a ngaih ring lo

Chief minister Lal Thanhawla chuan, Home minister R Lalzirliana'n Cabinet minister aṭanga bânna a thehluh chu a pawm dawn thu a sawi. NLUP chu Pathian lamṭang programme a nih thu sawi nawnin, chuvang chuan Court-ah khin ni mah se, Court-in thu tlingah a ngaihsak a rinawm loh niin a sawi bawk.

Lungleia thuthar theh­darh­tute'n an kawmnaah Chief Minister chuan, R Lalzirliana'n bânna thehluh chu a pawm dawn thu sawiin, "A lehkha ka la hmu lo. Patlingin a ka bâng a tiha ka pawm loh chuan eng nge sâwt ang," a ti.

Minister dang ruat chung­changa ngaihtuahna a neih tawh leh tawh loh zawhna chu Lal Thanhawla chuan, ngaihtuahna a la neih loh thu leh ngaihtuahna neih hun pawh a la nih loh thuin a chhang.

September 15, Inrinnia Lungleia Congress Bhavan-a inkhawmah Lal Thanhawla chuan, Home minister R Lalzir­liana'n minister a nihna aṭanga bànna a thehluh chungchang a sawi lang a, "A bàn chhan chu district headquarters a ni mai a, politics hi dikna, takna leh rinawmna nena khelh chi a ni. District thar siamte hi hmuia siam mai mai chi a ni lo a, sum leh pai, ramri chena ngaih­tuah ngai a ni," a ti a; dis­trict chungchang chu sorkar offi­cial-te ngun taka ngaihtuahtir a nih thu a sawi.

Lungleia Congress Bhavan-a inkhawmah vêk minister PC Lalthanliana, Lunglei North bialtu MLA pawhin thu sawiin, Home minister R Lalzirliana'n bànna a thehlut chu pawi a tih thu a sawi a, Congress party chhungah erawh buaina a awm phah thâwm a hriat loh thu a sawi a ni.

Tarlan tawh angin, R Lal­zirliana hian September 14, 2018 khan Cabinet minister aṭanga bânna a thehlut a, Chief Minister a awm loh avangin a bânna lehkha chu a personal secretary hnenah a pe. Chief Minister hian nizan khan Aizawl a rawn thleng nia thu dawn a ni.

Inrinnia Lungleia Congress Bhavan-a inkhawmah Lal Than­hawla chuan, "NLUP hmanga khawsak harsa zawkte tana hmalakna chu a hlawhtling chho zel a, eptu party zawng zawngte huat leh el ber a ni. Pathian lamṭang a nih vangin Court-ah hial khing mah se, Court-in thu tlingah a ngaihsak a rinawm loh. Mi harsa zawkte'n pawisa an dawn tur îtsîktute hi kan hmelma an ni tih kan hriat a ngai," a ti.

Mizorama hmasawnna lian tham zawng zawng chu Congress sorkar laia thleng vek nia sawiin Lal Thanhawla chuan, "Act East Policy kalpui a nih hunah phei chuan chhim lam hi insumdawn tawnna pawimawh, Gateway of South East Asia a la ni ang," a ti a; kum 10 chhung Congress sorkar term tawp dawnah pawh an party-a lawm luh tur an la awm zel chu chung lam malsawmna niin a sawi bawk.