Mamit DC vawiinah sawn a nih loh chuan Naktuk aṭangin DC Office khâr an tum

YMA sub-headquarters, Mamit kaihhruaiin Mamit khawpuia YMA, village council, tlawmngai pawl dangte leh political party hruaitute chu September 15, Inrinni khan an ṭhukhawm a; Mamit DC Bhupesh Chaudhary chu vawiin Thawhṭanni ral hmaa Mamit aṭanga sawn chhuak ngei turin sorkar an phût a, sawn a nih loh chuan Mamit DC pisa khâr an tum thu an puang.

Mamit Bawrhsap sawn chhuah chungchanga joint meeting hi Mamit sub-hqrs. YMA president K Eley Rosanga'n a kaihruai a; September 5, 2018-a Bhupesh Chaudhary sawn chhuak tura nawrna atana Mamita kawngzawhnaa resolution an lo siam tawh, September 10 ral hma ngeia Mamit DC sawn chhuak tura an phûtnain awmzia a nei lo chu pawi an tih thu leh hriatthiam harsa an tih thu an tarlang.

Bhupesh Chaudhary sawn chhuak turin file thui tak a kal tawh nia an hriat avangin tun hun thlengin dawhthei takin sorkar hmalakna an la ngaichang rih tih an sawi a; chutih rualin, "Vawiin thlengin sawn chhuahna order tihchhuah a la nih loh avangin Bhupesh Chaudhary hian a rang thei ang bera Mamit a chhuahsan theih nan na taka hmalak chhunzawm ni se," an ti.

Meeting chuan, Mamit DC Bhupesh Chaudhary chu vawiin Thawhṭanniah pawh Mamit aṭanga sawn chhuahna thupek (transfer order) a la chhuak lo a nih chuan, naktuk Thawhlehni aṭangin Mamit DC Office khâr ni se, a ti a; DC Office kharin awmzia a neih loh chuan Bhupesh Chaudhary-a'n Mamit a chhuahsan ngei theih nan hmalak zel ni se an rel bawk.

Tarlan tawh angin, Mamitah hian September 5-ah Bawrhsap sawn chhuah phûtna kawngzawh huaihawt a ni a, resolution an pass. Resolution-ah chuan, Tripura-a awm Bru-te electoral roll-a a rûk a rála thun luih a tum avangin an duh loh thu te; Mizoram inthlanpui awm turah Bru-te'n Mizoram páwna vote an thlak an remtih loh thu te; Mamit DC-in Mizo mipui leh tlawmngai pawlte hmusit leh diriam taka ṭawng khum a, mana a vau ṭhin chu an duh loh thu te; Bhupesh Chaudhury kaihhruaina hnuaiah inthlanna thianghlim leh felfai a awm an rin loh thute leh, Bhupesh Chaudhury chu September 10 ral hma ngeia sawn chhuah an phût thute an tarlang a ni.