NLUP leh SEDP hi politics aiâwt a ni - Lalduhoma
Zoram Peoples' Movement (ZPM) chief ministerial candidate Lalduhoma chuan, Congress NLUP leh MNF SEDP-te chu politics aiâwt a nih thu a sawi a, "Aiáwta chakai man kan tum chuan chakai duh zawng kan ngaihtuah ṭhin ang hian, heng sem rawn zuartute hian in vote an duh avangin an rawn zuar a ni,” a ti.
Lalduhoma hian September 14, 2018 khan Buangpui khuaah thu sawiin, "NLUP leh SEDP aiáwtah hian tumah lo tla lo turin mipui ka chah duh a, ZPM chuan kut hnathawktute thawhrima an hausakna tur kan aupui. Pawisa nâwi îttir zel tumna sem policy ang mai mai hi ZPM-in kan zuar ve lo," a ti a; mahni kea dingchhuak a, ke an kal theih ngeina tur an zuar tih a sawi.
Mipuite chu beiseina nung nei tura sáwm Duhoma chua, “Beidawnna hi setana hmanrua a ni a, beiseina nung hi Pathian hmanrua a ni. Kan ram ke bai ṭhanṭhu mek hi ke pangngai pek a, mahnia ding thei tur a siam hi ZPM chuan kan tum a ni," a ti.
MNF leh Congress party-te chu a party ang chuan an ṭha lo hauh lo tih sawiin Lalduhoma chuan, "Hruaitu ngai rengte'n belh khawmin kum 34 zet min hruai tawh a, kum nga chhung min kaihruai leh tura anni pahnih bawk thlan leh a, a ngai ang bawk a kal leh tur a nih a chian sa avangin heng party pahnihte kaihruaina ni lo, mipui sorkar a pian a, hruaitu thar kan neih theih nan ZPM hi a lo piang a ni," a ti a; Mizoram ṭhatpui leh dampui ngei tur damdawi pek an tum thu a sawi.
ZPM Chief Ministerial Candidate chuan, kum 40 dáwn Mizoram enkawltute'n mipui an tirethei tê tê a, inthlan dawnah vote leisak tumin an veh leh mek tih sawiin, "Kan thlai thar min leisak tum si loin, a thartute hi min lilâm a, nuai khat te, nuai thumtein min chháng mek. A thlawna sem tuma min chan tum mektute hian BPL her chhuahna khawl an bun mek a ni," a ti.