Dinhmun sang phûtin Aizawlah Zirtirtu leh zirlaiten kawng zawh

Mizoram sorkara lumpsum grant-in-aid higher secondary school (HSS) pakuate adhoc grant-in-aid dinhmuna hláng kai tura sorkar nawr nan Mizoram Govt. Lumpsum Grant-in-Aid Higher Secon­dary Association (MIGLAHSSA) leh sikul awm­na khaw pakuaa Joint Students Union bultumin Inrinni khan Aizawlah kawngzawh a ni.

Kawngzawh hi Chan­mari kâwn aṭanga Vanapa Hall thleng neih a ni a; kawng zawhnaah hian resolution pass-in, 'Kan sorkar hian he kan thil phût, adhoc grant-in-Aid a hlankai hi kumina term chhung ngei hian min tihhlawhtlinsak kan phût a, a tihlawhtling thei lo a nih chuan, min tih­hlawhtlinsak theihtu sor­kar siam turin heng consti­tuency pakuaah hian theih­tawpin hma kan la ang' an ti.

MIGLAHSSA-a tel HSS pakuate chu - Phullen HSS, Thingsulthliah HSS, Tuisualral HSS, Zobawk HSS, Farkawn, HSS, NE Khawdungsei HSS, East Lungdar HSS, West Phaileng HSS leh Zualnuam HSS-te an ni.

MIGLAHSSA chuan thuchhuah siamin, sikul pakuate hi adhoc grant-in-aid a hlankai a nih theih nan hun rei tak aṭang tawhin sorkar leh School Education depart­ment-te an lo nawr tawh ṭhin thu an tarlang a, "Tun hun thlenga a hlawhtlinna kan la hmu lo hi ná kan ti tak zet a ni. Heng thing­tlang HSS pakuate hi khawtlang ṭangrualin kum 14 liam tawha an din vek a ni a, khaw hrang hrang hrang 70 chuang aṭanga pan khawmin zirlai 850 vel an awm mek a ni," an ti.