KHAWTHLIR

Thisen pe
Inrinni khan Mission Vengthlang Bial ṬKP chuan Aizawl Civil Hospital-ah thisen unit 44 an pe a, a petute mipa 40 leh hmeichhia pali an ni; Electric Veng Football Club-in unit 6 vel an pe bawk. Model Veng Branch KṬP-in an din champha vawi 19-na pualin Synod Hospital tan thisen unit unit 31 an pe a, a petute mipa 29 leh hmeichhia pahnih an ni. Lawngtlai Salem unit ṬKP member hmeichhia 11 leh mipa pakuate'n Lawngtlai District Hospi­tal-ah unit 20 an pe bawk.

Senior inkhawmpui
Mizo Sunday School Union (MSSU) hnuaia Senior department-te chuan nimin khan pastor bial hrang hrangah inkhawmpui an hmang. Senior department inkhawmpui hi bial tam takah chuan chawhma, chawhnu leh zanah hun hman a ni a, bial ṭhenkhatah chuan Inrinni zan aṭanga hmang pawh an awm. Pathian thu, hla leh thil chi hrang hrang hmangin inpàwlhona hun an hmang a ni. MSSU report hnuhnung bera a lan danin, Senior department-ah zirtirtu 4,610 leh zirlai 29,676 an awm a ni.

Lemchana inelna
School Education leh Art & Culture department chuan tun hnai khan Chanmari YMA Hall-ah high school leh higher secondary school zirlaite tan Mahatma Gandhi pian champha vawi 150-in lawmna chi khat atan State Level Drama Competition an buatsaih. He intihsiaknaah hian sikul pasarih an tel a, Synod Higher Secondary School pakhatna an ni a, Rs. 10,000 an dawng. Synod HSS hi September 23-25, 2018 chhunga New Delhi-a national level competition-ah Mizoram aiawhin an tel ang.

Sorkarin Remsiami Nuai 10 a pe dawn
Sports & Youth Services minister Zodintluanga chuan, Asian Games 2018-a Indian wo­mens hockey team-a tel Lalremsiami, Kolasib chu cheng nuai 10 pek a nih dawn thu September 14, 2018 khan a puang. India womens hockey team hian Asian Games-ah hian silver medal an la a, Mizoram sorkarin dan a neih saah chuan, Asian Games-a silver medalist-te chu Rs. 4,00,000 pek tura tih a ni a, mahse Lalremsiami hi Mizoram sorkar chuan Rs. 10,00,000 a pe dawn a ni.