Sorkarin V/C lawmman an pe thei lo - Dr Thangtea ; District puitlinna tur budget-ah kan dah dawn - Zawma

MNF vice president Dr R Lalthangliana chuan, Congress kaihhruai sorkarin V/C-te lawmman a pe thei lo lo niin a sawi. MNF treasurer Vanlalzawma chuan, MNF an sorkar chuan kum 2019-a budget session-ah MNF sorkarin district a puan tawhte tihpuitlinna tur telh a ni dawn niin a sawi bawk.

September 15, Inrinnia Darzo khuaa vantlang inkhawmah R Lalthangliana chuan, khawtlang mipuiin an khawtlanga roreltu atana an thlan V/C member-te lawmman Congress sorkarin pe thei loin a batsak reng niin a sawi a, "V/C-te lawmman hi thla thum dana pek ṭhin an ni. Congress sorkar hian vawiin thlengin a la batsak a, hei hi mipui thlan lalte ngaih pawimawh lohna leh zahlohna lian tak a ni," a ti.

Dr R Lalthangliana chuan, "V/C-te lawman tur hi NLUP-ah an lo hmang daih nge, tih chu ka zawhna a ni a, pe thuai turin Pu Hawla sorkar kan phût a ni," a ti a; MNF an sorkar hunah V/C lawmman an tihpun tur thu leh an thuneihna pawh nasa taka an tihsàn dawn thu a sawi.

MNF treasurer Vanlalzawma pawhin Inrinni zing khan a bial chhunga Bungkawnah street campaign a nei a; thu sawiin, Congress party vice president leh Home minister R Lalzirliana'n minister aṭanga bànna a thehlut chu, kum 2008-a MNF sorkarin district a pek tawh, Congress sorkarin a tihhlawhtlin duh loh vang a nih thu a sawi a, "Pathian leh mipui zara MNF kan sorkar a nih chuan, nakkum budget session-ah district kan puan tawhte function-tirna tur a tel dawn a ni," a ti.

Vanlalzawma chuan, "Nikum financial year khan kawng siamna turin cheng nuai 80,000 vel a awm a, chutah chuan nuai 30,000 vel hmangin, nuai 50,000 dáwn hman lohin a awm a, hei hi sorkar inthlahdah vang a ni," a ti. Mizorama kawngpui chhiate chu sum awm loh vang a ni lo tih sawiin, "Sorkar inthlahdah vang liau liau a ni. Pathian leh mipui zara MNF a sorkar chuan kan kawngpui a ṭha ang," a ti bawk.