Minister-in chhungkaw 74 chenna tur in a hawng

Ministry of Housing and Urban Affairs (MoHUA) hnuaia Rajiv Awas Yojan (RAY) hma­lakna kaltlanga Falkland Venga chhungkaw 74 chenna tur in sak thar chu September 14, Zirtawpni tlai khan UDPA minister Zodintluanga'n a hawng.

Zodintluanga chuan, khawpui tihhmasawnna leh khawpui cheibâwl nan Urban Development hnuaiah hmuh theihin Aizawl khawpuiah leh census notified town-ahte hna pawimawh leh vantlang tana ṭangkai tak tak thawh a nih thu a sawi a, "Hetih lai hian, mipuiin an hriat lâr loh zawk Poverty Alleviation aṭangin Urban Development hnuaia hmalakna aia tam zawk mah thawh a ni a, thawh mek zel a ni," a ti.

UDPA Minister chuan, Falkland Venga RAY Pilot Project chu scheme tàwp tawh, department hnathawkte inpekna leh remhriatna vanga puitling thei a nih thu sawiin, "Sum leh paia thawh chhuah nei tlem zawkte leh a mamawhtu, khawpuia cheng mi harsate tan malsawmna in a nih ngei ka beisei," a ti a; in thara lut turte chuan veng chhung hmasawn leh zual nan theihtawp an chhuah ve zel a ngaih tur thu a sawi.

RAY project chhunga multipurpose community centre chu a awmna hmuna chengte tan bakah, veng chhung mipui leh a mamawhtu a piangte tana hman ṭangkai a nih theihna atan UDPA Minister chuan Falkland Local Council hnenah sorkar aiawhin a hlan nghal a ni.

Bialtu MLA R Lalrinawma pawhin thu sawiin, RAY Pilot Project chu a veng neitu Falkland Veng bakah, Aizawl khawpui tan hmasawnna, khawsak harsa zawk tan malsawmna leh vanneihna a nih thu a sawi a; buildinga awm thar turte chu ṭha tak lo lawm tur leh chiau-au turin khawtlang hruaitute leh Falkland Veng mipui a chah.

RAY Pilot Project sak nan hian RAY hmalakna hnuai aṭangin cheng nuai 622 hman a ni. In pahnih sak a ni a; a lian zawk - Multi Rental DU Block pakhat zel ṭhuthmun chu square ft. 1,665-a zau a ni a, chhungkaw pakhat chenna tur chu square ft. 340-a zau a ni. In tê zawk ṭhuthmun zau zawng chu sq.ft. 40 a ni thung.