Zirtirtute'n ambulance panga Health dept. hnenah an pe

Mizoram Teachers' Association (MTA) chuan nimin khan Mizoram sorkara Health & Family Welfare department hnenah ambulance panga an pe. Ambulance-te hi an dahna tur hmun district-a MLA-te'n an dawng a ni.

Ambulance hlanna inkhawm hi Secretariat tualah buatsaih a ni a, de­puty chief minister Tawn­luia, Health minister Dr R Lalthangliana, School Education minis­ter Lal­chhandama Ralte te bak­ah, minister, MLA, Chief Secretary leh sorkar official eng emaw zat an tel.

Health Minister chuan, ramin hun khirh tak a tawn mek laia thu lawmawm hriat tur a awm ṭhin chu lawmawm a tih thu sawiin, "Chief Minister-in theihtawpin hma min lakpui a ni. Covid-19 hian sum a ei na hle a ni," a ti.

Dr R Lalthangliana chuan, Covid-19 donaah sorkar hnathawk, kohhran, pawl leh mimal tu mah tlanchhe loin, theih ang tâwk tâwkah an pên chhuah thu sawiin, "Political party-te pawhin theih ang angin an ti ve a ni," a ti a; Covid-19 dona atan inpete chungah an lawm tak zet thu a sawi.

School Education minister Lal­chhandama Ralte pawhin thu sawiin, Education changtu a nih angin an department-a thawktute inpeknaah a lawm thu a sawi a, "Education department-a thawkte'n CM Relief Fund-ah cheng nuai 150 an chhûng lut tawh a, tunah MTA-te'n ambulance panga an thawh leh a ni. MTA-te hian cheng nuai 12 chu district hrang hranga ramri vengtute hnenah an hlan leh dawn bawk," a ti.

MTA hruaitute tarlan danin, zirtirtute'n Covid-19 dona atana thawh­lawm an thawh tawh hnuah Education Minister-in ṭanpuina kawnga hma la leh turin a ngen a; ngenna tihlawhtling turin ruahmanna an siam a ni.

Covid-19 dona atan hian tun dinhmunah Mizoram sorkarin Covid-19 dedicated ambulance a mamawh tih an hria a, a leina atan zirtirtute'n cheng nuai 42 an thawh khawm a, ambulance leina atana sum hman bâng chu ramria duty-te hnenah an hlàn leh ang.

Ambulance-te hi Zoram Medical College, Aizawl district, Champhai district, Saitual district leh Khawzawl district-a dah tura tih a ni.