Mau/rua chî supply tur chungchangah MLA Dr Vanlalthlana'n zawhna a zawt

ZPM Legislature Party (ZLP) secretary Dr Van­lalthlana chuan nimin khan mau/rua chi supply tur chungchangah Horticulture department hotute zawhna a zâwt a, National Bamboo Mission (NBM) sum hman dan hrilh turin a ngen.

Dr Vanlalthlana chuan, Horticulture department a zawhnaah hian June 3, 2020-a mau chi supply tur zawnna atana tender an tihchhuah a lo hmuh thu tarlangin, "Chanchinbua tarlan danin, mau chi leina tur hi NBM 2019-20 sum aṭanga dawn a ni tih ka lo hmu  a ni. He mau/rua chi tender leh kan sor­karin NBM sum a hman dan chungchangah hian a hnuaia zawhnate hi khaw­ngaiha min chhànsak theih chuan a lawmawm hle ang," a ti.

•    NBM-in Revised Operational Guidelines, June 2019-a a tihchhuahah khan NBM hnuaia mau lei leh buaipui dan tur kimchang taka tarlan a ni. Guideline 10.2 (phek 18-na)-ah, 'Commercially important bamboo species for plantation under the Mission, as identified after discussion with stakeholders are Bambusa tulda, B. bambos, B. balcooa, B. cacharensis, B. polymorpha, B. nutans, Dendrocalamus asper, D. hamiltonii, Thyrostachys oliverii, and Melocanna baccifera. Besides, States may encourage plantation of indigenous species as per choice of farmers and industrial importance' tih a ni. Clause 10.2-ah hian Dendrocalamus Brandisii leh Dendrocalamus Latiflorus-te tarlan a ni ve lo. Eng guideline clause hmanga lei tura tih nge ni?

•    NBM emaw, central lama ministry/department hnenah guideline páwna pawisa hman dilna thehluh a ni em?

•    NBM Operational Guidelines 10.2.2-in a tarlan angin, State Bamboo Mission-in certifying agency a ruat tawh em?

•    Certifying agency chuan Mizoram chhungah mau chíngtute enfiah a nei tawh em?

•    KVK kaltlangin mau chíng duhte emaw, mau sawngbawl tumte emaw training neihtir an ni tawh em?