Congress-in an vice president R Lalzirliana an hnawtchhuak

Mizoram Pradesh Congress Committee (MPCC) chuan, an vice president R Lalzirliana chu an party aṭangin nimin khan tiam chin awm loin an hnawt chhuak. Hetihlai hian R Lalzirliana'n Cabinet Minister aṭanga banna a thehluh pawh nimin vek khan Chief Minister rawtna angin Governor-in a pawm.

R Lalzirliana hnawhchhuah a nih thu nimin chhun dar 1 khan Congress Bhavan-ah MPCC Disciplinary Action Committee (DAC) chairman C Lalpianthanga'n a puang.

C Lalpianthanga chuan thuthar theh­darhtute kâwmin, an hotupa R Lalzirliana hnawhchhuah a ngai chu pawi a tih thu a sawi a, "Kan senior, party-ah pawh theihtawpa thawk, kan chhiat ber lai pawha a kûl a taia thawk a ni. Hetiang tih hi kan duh lo a, pumpelh kan tum a ni. Thâwm neih hat a nei ṭhin a, an inah lêngin thu lêngvâk awmte sawifiah turin kan ngen ṭhin," a ti.

Insawifiah tura an tih pawhin R Lal­zirliana chu a insawifiah duh lo nia sawiin C Lalpianthanga chuan, "Cabinet minister aṭanga a bàn hnuah pawh committee pawimawh tak a mausam a ni. Kan hotupa a nih avangin, mi dang kan tih dan ni loin an inah kan kal chilh a, mi dang kan kal chilh ngai lo," a ti a; R Lalzirliana chu hnawhchhuah loh theih loh a nih tâk thu a sawi.

Zawhna chhangin DAC member-te chuan, MNF-in candidate atana an sawm ve tho Lalrinliana Sailo, MLA chu a insawifiah avangin show cause notice an pe ve lo niin an sawi a, "A hmain kan President hnenah a insawifiah a, a hnuah Congress Bhavan-ah a insawifiah leh a ni. Ani chu a insawifiah zel," an ti.

DAC-in R Lalzirliana hnena an party member aṭanga hnawhchhuahna an thawnah chuan, September 17, 2018-ah a chungchang ngun taka an ngaihtuah thu an tarlang a, "September 11-a show cause notice kan pek che chu sawifiah tlaka i ngaih loh vang leh Home Minister aṭanga i bàn hnuah press mite hmaa kan party inkaihhruaina, inlungrualna, inpumkhatna leh thawhhona tichhe thei zawnga thu i vawrh darh leh zel avangin MPCC Constitution Article X tlawhchhanin Congress party member-a i nihna chu September 17, 2018 aṭangin tiamchin awm loa hnawhchhuah i ni tih kan hriattir a che," tiin an ziak a ni.