NPP-in Mizoramah candidate neih tum

National People's Party (NPP) hotupa leh Meghalaya deputy chief minister Preston Tynsong chuan, kumina Mizoram Assembly inthlanpui awm turah NPP chuan candidate neih an tum thu a sawi.

Nimina Hotel Regency-a thuthar thehdarhtute nen an inkawmnaah Preston Tynsong chuan, Mizoram MLA inthlanah candidate an neih dawn thu sawiin, "Candidate kan neih zat tur kan hre lo. Candidate kan nei ngei dawn a, tunah hian committee-te kan siam tawh a, anni hian an zir chiang ang a, chuta ṭang chuan ngaihdan kan siam ang," a ti.

Preston Tynsong chuan, thawhpui an neih dawn leh dawn loh an la tihchian lo thu sawiin, "Committee-te'n an zir chian hnuah thutlukna kan siam ang. Kan party chuan tu pawh kan thawhpui thei," a ti a; party biak an la neih loh thu a sawi.

September 16, Pathianni tlai khan Preston Tynsong hian minister aṭanga bâng ta R Lalzirliana, MPCC vice president hlui chu a chenna inah a tlawh a; chumi chungchanga zawhna chhangin, "Politics thil kan sawi lo. Ka ṭhianpa a ni a, a fapa a sún a, ṭhian kan nih angin ka tlawh a ni. R Lalzirliana hi hetiang dinhmunah hian ding lo mah se, NPP chuan kumin MLA inthlan hi chuh kan tum hrim hrim a ni," a ti.