Sorkarna kan ban phâkah a awm - K Sapdanga
Zoram Peoples' Movement (ZPM) hruaitute zinga mi K Sapdanga chuan nimin khan an pisaah thu a sawi a, "Sorkarna hi kan ban phâkah a inchhawp hnai tawh," a ti.
Mizoram mipuiin sorkar hmel thar hmuh an duh tih sawiin K Sapdanga chuan, "Thuràwn min pe ṭhintute hi sawi rem chiah lo an tam. Kan sorkar loh hlautute ṭan nasatzia kan hria. Tunah hian sorkarna hi ban phâkin a inchhawp hnai tawh a, kan lungrual phawt chuan kan chang ang," a ti a; an lungrual loh erawh chuan an sorkar loh tur thu a sawi.
ZPM Leader chuan, kumin October thla chawlhkar thumna velah inthlan puan a nih hmel thu sawiin, "Candidate-te'n zalen taka campaign-na hun thla khat pawh kan nei tawh lo tih hriat a ṭha. District, block leh local body-a Ṭangrual Pawl zawng zawngte pawhin kan sûkthlêk i thlak tawh ang u. Kan hotute hnenah rawtna kan thlen ṭhin, mahse, kan rawt ang ang tipuitling tura nawr vak vak erawh a hun ta lo," a ti.
Congress buaina chu lo buaipui ve chiam a ṭul lo tih sawiin Sapdanga chuan, "MNF a nghawng dan tur lo suangtuahpui a ṭul hek lo. Keini hi lungrual ila, thu inawih dial dial ila. CM candidate atana Val Upate'n min pek kan pawm tlang ang khan, candidate atana kan hotute'n an chhawp chhuahahte hian, rawtna kan thlen tam tawk tawh a, hotute i ring tâwk ang u. Kan sorkar lo hlauh dah ang e," a ti.
ZPM Leader chuan, prime minister Narendra Modi chu ram tihmasawnna lamah leh ram tihhausakna lamah thawk chhia a tih loh thu a sawi rualin, "Amaherawhchu, sakhaw dang ngaithei lo, nékchêp satliah ni loa nèk ral duhtu a nih miau avangin, lei leh van siamtu kan Pathian mit naute hi a khawih ve te pawh a ni mahna," a ti a; BJP chu inthlan hmasak aia an tlakhniam tur thu a sawi.
K Sapdanga chuan, India ramah Hindu 80% an awm laia Muslim 13% leh Kristian 2.3% te sorkar laipuiin hnawk a ti chu mak a tih thu sawiin, "Kristiante hi thlêm emaw, vau beh emawa nêk ral chi an ni lo tih BJP hian an hre chiang tawh. Mizo zingah ngat phei chuan, Kristian sakhua nêk ralpui tura sum hmanga thlèm chhuah theih an nei tlem tih an hre chiang a, a thla têlin an tha pawh an thlah a ni," a ti.