Congress kulhpui a chim mek - Zoramthanga

MNF president Zoram­thanga chuan, "Congress kulhpui a chim hum hum mek a ni," a ti.

Nimin khan MNF chuan an party office Mizo Hnam Runah member thar lawm luhna inkhawm an buatsaih a, heng zingah hian 2014-a Lok Sabha inthlana MNF party candidate Robert Romawia Royte pawh a tel.

Zoramthanga chuan, "Congress party chu India ram hmun dang leh Mizoramah a chim hum hum mek a, Congress

aṭang hian 'chherpui' a la rawn kal dawn a, a lo kal hunah phei chuan kan ri hum hum mai dawn a ni," a ti a; mi thar tam tak Zoram hmun hrang hrang aṭangin an lawm lut mek zel niin a sawi.

Congress sorkarah hmasawnna hmuh tur a tlem nia sawiin Zorama chuan, "Mipui an bei­dawng tawh tak zet a, development a ṭhanṭhu mek a, kum nga sorkar leh phei se chuan a ngaihna a awm tawh lo ang. Kohhran, mipui, NGO leh zirlaite an beidawng tak zet tawh a ni," a ti.

MNF President chuan, kumina Assembly inthlan­pui atan MNF chuan bial pakhat chauh tih lohah chuan an candidate turte an tifel thawhkhat tawh tih sawiin, "Party lian kan nih angin candidate beisei bial khatah pawh eng emaw zat an awm hlawm a, candidate chang lo turte pawhin hrethiam takin candidate changte an ṭawiawm thei hi a lawmawm em em a ni," a ti a; an party mite chu an duh ni chiah lo candidate an neih pawhin an pawm thiam niin a sawi.

Robert Romawia pawh­in thu sawiin, "Mah­ni mihringpuite leh Pathian rawng zau zawka bâwl theihna tur niin ka hria a, chutiang rilru pû chuan MNF ka zawm a ni. Nationalism leh development ka ngai pawimawh a, chumi kalpui kawp thei party awmchhun chu MNF hi an ni tih ka hria a, lawm takin MNF-ah ka lut a ni," a ti.

Nimina Mizo Hnam Rûna inkhawma MNF-a lawm luh zingah hian Congress ṭha­lai vice pre­sident hlui PC Lal­tlanmawia bakah sorkar officer pension tawhte an tel a ni.