KHAWTHLIR

Pungkhawm dawn
National Trade Union of Mizoram (NTUM) chuan, hlawh ennawn leh skill tihsanna dan siamṭhat an phût chungchang­ah Mizoram sorkar aṭangin thu lawmawm an dawn loh avangin, an lungawi lohzia tihlan nan vawiin hian NTUM pisa, Upper Khatla-ah punkhawm an huaihawt dawn. NTUM chuan, muster roll employee zawng zawngte chu an hna kalsan a, lungawi loh lantirnaa kal turin an hriattir a ni.

Tanpuina hlan
Premier Vigilance & Security (PVS) agency hnuaia security guard, duty lai thi Hav. Robert Lalsangzuala râl nan Mizoram Ex-Servicemen League chuan Rs. 1,00,000 an hlan. Ṭanpuina sum hi MESL president Col. John Zama'n Robert Lalsangzuala nupui Zohming­liani, Bethlehem Veng­thlang hnenah a hlan a ni.

Ṭanpuina sem
NEDP hnuaia Chief Minister’s Rural Housing Scheme chu tun hnai khan Ngopa Jubilee Hall-ah sem a ni a, bialtu MLA H Rohluna'n a hmanpui. In chei ṭhatna tur ṭanpuina hi khaw pali aṭanga thlan chhuah mi 96 hnenah first instalment Rs. 15,000 ṭheuh pek a ni.

Entrepreneurship zirhona buatsaih
Centre for Entrepreneurship Development, Govt. Aizawl College leh Indian National Fellowship Centre ṭangkawpin an buatsaih, ni hnih awh tur entrepreneurship chungchang zirhona chu nimin khan Aizawl West College-ah ṭan a ni a, India ram hmun hrang hranga mithiam rawn kalte'n entrepreneurship chungchang an sawi a, vawiinah chhunzawm a ni ang.

Lawmthu sawi
Mizoram SSA Instructor Association (MISIA) chuan thuchhuah siamin, SSA-a thawkte hlawh sorkar laipuiin an tihhniam avangin Mizorama SSA hnuaia thawktu hrang hrangte an thlaphâng hle tih an tarlang a, "Mangang taka kan awm laiin, kan Chief Minister, Finance Minister, Education Minister leh SSA officer-te'n kan hlawh pangngai kan lak theih nan hma an la a, kan hlawh pangngai anga kan lak theih nana sorkar laipui rawn pek bak state sorkarin tum belh an inhuam thu kan hriatin kan lawm hle a ni," an ti.