Mamit DC-in order a tihchhuah copy Mamita Joint Committee-te'n an hâl

Mamita political party, NGO leh V/C zawng zawngte intêl khâwm Joint Committee chuan, Mamit DC-in Mamitah Cr.PC 144 hmanga mi panga aia tam pun khawm khapna thupek a chhuah chu duh loin, nimin khan a copy an hâl.

Mamit DC Bhupesh Chaudhary sawn chhuah an phûtnaa an hun tiam chu nimin tlai dar 5 khan a tawp avangin, vawiin zing dar 8 aṭangin Mamit DC pisa an khâr dawn tih an puang.

Mamita All NGO, All Political Party & V/C hruaitute chu nimin zing khan an ṭhukhawm a; bawrhsap Bhupesh Chaudhary sawn chhuah an phûtna tihhlawhtlin a nih loha an hmalak dan tur an sawiho. DC transfer order chhuah a nih loh chuan, vawiin aṭangin tiam chin awm loin Mamit DC pisa khâr an rél a; zing dar 8 aṭangin duty an tum a ni, Bhupesh Chaudhary chu Mamit aṭanga a chhuah hma chuan na taka hmalak zel dan tur an ruahman bawk.

Mamit DC Bhupesh Chaudhary hian September 15, 2018 khan Cr.PC Section 144 hmanga thupek chhuahin, Mamit district-ah mi aia tam punkhawm khapna thu a chhuah a, tuhpek hi September 16 zan dar 9 aṭanga hman tura tih a ni.

Mamit Joint Committee chuan Mamit DC chu Mizo mipui hmalakna zah lo leh ngai pawimawh loa an ngaih bakah, Cr.PC Section 144 hmanga order chhuah chu Mamit mipui thamlohnaah leh Mizo mipui hmuhsitnaa an ngai a; nimin khan Charkâwnah order copy an hâl.

Bhupesh Chaudhary-a'n order a chhuah copy hâlna hian YMA sub-hqrs. Mamit president K Eley Rosanga chuan, DC Bhupesh Chaudhary chu a rang thei ang bera Mamit chhuahsan turin an hriattir nawn tih a sawi a; Mamit district mipui leh Mizo mipuite chu ṭangrual deuh deuh turin a sáwm.

September 15, 2018 vek khan Mamit DC Bhupesh Chaudhary chuan thupek chhuahin, Mamita NGO hrang hrang hruaitute zinga mi paruk, sorkar hnathawkte chu Election kaihhnawiha an hna tur hriattirna a chhuah a; hei hi NGO-te hmalakna tihṭhuanawp tumnaa an ngaih thu, Mamit Joint Committee chuan an tarlang.

Mamit DC order-a a lan danin, NGO hruaitu sorkar hnathawk paruk, Election kaihhnawiha an hna tur pek tharte zingah hian Mamit sub-hqrs. YMA president K Eley Rosanga pawh a tel a; mi dangte pawh YMA leh MHIP hruaitute an ni. Mi parukte hi nimin zing dar 9-ah Mamit DC pisaa in report tura tih an nih angin, an in report a ni.

Mamit sub-hqrs. YMA hruaitute chu September 16 tlai khan DC Bunglow-ah kalin, bawrhsap Bhupesh Chaudhary chu Mamitah awm tawh lo tur leh a rang thei ang bera Mamit chhuahsan tura Joint Committee-in an hriattirna lehkha an pe.

Mamit Joint Committee-in lehkha an pekah chuan, Tripura camp-a electoral roll revision neih tawh a venhim zawh loh avangin Mamit DC ni tlaka an ngaih loh thu te, Mamit district hmasawnna kal mek tiṭhuanawp zawnga hmasawnna tur sum a hrên khawtlai thu leh chu chu Mamit district mipui zah lohnaa an ngaih thu te, a kaihhruaina hnuaiah Mamit district mipuiin 2018 inthlanpuiah vote an thlak dawn loh thute an ziak a ni.