District hospital, CHC leh PHC thuam nan Cheng nuai 3,000 chuang dah

18th September, 2018

Mizoram sorkar chuan district hrang hranga district hospital tihchangtlun nan kum 2017-18 chhungin cheng nuai 2,000 chuang a hmang tawh a, kum 2018-19 chhunga primary health centre (PHC) leh community health centre (CHC) tihchangtlun nan cheng nuai 1,000 an dah leh bawk. Kum hnih chhunga district hospital, PHC leh CHC tihchangtlunnaa atana sum dah zat hi nuai 3,000 chuang a ni.

Planning department hotute leh district hospital-a doctor-te chuan sorkarin NEDP aṭanga district hospital-te a thuam ṭhat chhan chu, thingtlang lamah natna tam tak Aizawl pan ngai loa khawl ṭha hmanga an inenkawl theih nan a nih thu an sawi a; damdawi-in tihchangtlun hnuah phaia damlo thawn ngai tam tak pumpelh a nih tawh thu an sawi.

Mizorama district hospital pariat leh Kulikawn Hospital bik tana kum 2017-18 chunga khawl leh hmanraw leina an pek zawng zawng chu Rs. 20,00,04,128 a ni a; chu sum hmang chuan district hospital-a hman tur khawl thar ṭha tak tak lei a ni tawh. Hmanraw ṭhenkhatah chu a awmna tur damdawi-inah bun a ni tawh a, supply order pek tawh, khawl la dawn loh a awm bawk.

Planning department hotute chuan, thingtlanga damdawi-inte tihchangtlun ngaih pawimawh chhan sawiin, "Thingtlang aṭangin mi harsa ve tak tak damlo an awm a, district hospital-ah an kal a, tih theih loh an nei ṭhin. Harsa takin, serious lutuk loah pawh Aizawlah an lo kal zel a ngai a, thlen-in leh bialtu MLA tihbuai thlengin a nghawng ṭhin. Hei vang hian damloh thila Aizawl kal ngai lo a, district hospital-ah an inenkawl theih nan khawl thar leina peka thuam chak hi sorkarin a tum a ni," an ti.

CHC leh PHC bik tihchangtlunna atan kum 2018-19 kal laiah hian cheng nuai 1,000 dah a ni a, khawl lei tura inbuatsaih mek a ni. Aizawl Civil Hospital medical superintendent Dr KL Remsanga chuan, damdawi-inte tihchangtlun a nih avangin phai lama damlo thawn a tlakhniam phah thu a sawi.

Aizawl Civil Hospital (ACH) bikah NEDP aṭanga lei khawl 27 bun a ni tawh a, khawl dang eng emaw zat la bun leh tur a awm. ACH tihchangtlunna atan hian kum 2017-18 khan sorkarin Rs. 6,92,08,735 a hmang a, khawl thar 46 lei a ni.

Kum 2017-18 chhunga khawl lei dan
# Damdawi-in Sum hman zat Khawl zat
1. Aizawl Civil Hospital Rs. 6,92,08,735 46
2. Lunglei Civil Hospital Rs. 4,48,96,983 23
3. Siaha District Hospital Rs. 1,09,50,672 24
4. Lawngtlai District Hospital Rs. 1,28,29,328 15
5. Kolasib District Hospital Rs. 1,38,73,018 22
6. Serchhip District Hospital Rs. 1,71,76,578 19
7. Champhai District Hospital Rs. 1,44,04,203 17
8. Mamit District Hospital Rs. 1,46,60,611 14
9. Kulikawn Hospital, Aizawl Rs. 20,04,000 6
TOTAL Rs. 20,00,04,128 186