Mau hman ṭangkai chungchang sawiho

India hmarchhak biala in sakna atana mau hman ṭangkai chungchangah mithiamte inràwn khawmna, National Workshop on Utilization of Bamboo as Building Material in NE Region chu nimin khan Secretariat conference hall-ah buatsaih a ni a, Finance minister Lalsawta'n a hawng.

Lalsawta chuan, Mizoramin mau a nei ṭha tih an hriat thu sawiin, "Kan ngah hle tih pawh kan hmu vek a, hlâwkpuina tham a ni tih pawh kan hria a ni. India rampum huap seminar, mau chung­changa mithiam ber ber fuan khawmna Mizoramin kan thleng hi a state ang pawhin kan vanneihpui ngei ka beisei," a ti.

Workshop-a mithiam­te sawi danin, India ramah mau leh rua chi hrang 125 vel a awm a; hmarchhak bial bikah mau chi hrang hrang 50 vel a awm. Mizoramah chuan mau chi hrang hrang 25 vel a awm a; Mizoram chu zîm mah se, a zau zawnga chhûta mau chi hrang awm tamna leh ṭhat duhna ber a nih bakah, state pumpui hmun thuma ṭhena hmun hnih chu mau awmna a nih avangin 'Bamboo State' tia vuah a ni.

Tlo zawk tura mau sawngbawlte chu kum 50 vel thleng chhe lo tura ngaih a ni a, mau thah (treated) loh erawh chu kum li vel bak hman tlak a ni lo. Mau chu kahpathir tluk zeta khawng, in sakna atan pawh cement, balu leh rawrate nena chawhpawlha concrete structure siamna atan hman theih a ni. Mithiamte chuan, environment humhalhna atan leh lirnghing laka a him zawk avang te, kahpathir tluka a tlo tho avangin mau hman uar zawk a nih theih nan engineer leh architech-te'n ngaih­tuahna seng se ṭha an ti a ni.

Workshop hi Central Building Research Institute, Roorky ( CSIR - CBRI) huaihawt a ni a; a senso chu DoNER, North Easter Council (NEC) leh Science & Technology Intervention in North East Region (STINER)-te tum a ni thung.