Mau chî buaipui a hun lo - Mizoram BJP

BJP, Mizoram Pradesh chuan nimin khan thu­chhuah siamin, mau chî buaipui a hun lo tih an tarlang a; "Covid-19 hripui léng laka kan him hnuah mau chi neitu monu a dam tawh chuan lei mai zawk turin CM Pu Zoramthanga chu kan ngen a ni," an ti a; Covid-19 vanga mipui an buai laia Mizoram sorkarin mau a buaipui chu vanduaithlak an tih thu an tarlang.

Mizoram BJP chuan, Lunglei Ramthar Venga khung hran hmeichhiate'n an swab sample test result an hriat har lutuk vanga chaw an nghei thu leh Siaha district-a khung hrante pawhin hun rei tak result an hriat theih loh thu an tarlang a, "Quarantine facility-a awm mi eng emaw zat, khung hran hun a zawh tawh hnu pawha test result a chhuah hleih theih loh laia sorkarna chelh mek tu MNF-in mau chi an lo buaipui daih hian Mizo mipui min ngaihnêpzia a tilang chiang hleah kan ngai," an ti.

Mizorama Covid-19 vei an awm ṭan tir lamah sorkar hotute'n swab sample endikna tur laboratory neih a hautakzia press conference meuh neiin an sawi tih tarlangin BJP chuan, "A hnuah kháwl hawh chawpin an bun a. Chumi hnuah Pu Than­tluanga, Hauva & Sons-in RT-PCR leina tur sum sorkarah a pe a, ni thum hnu lekah awlsam takin a thleng thei a ni," an ti a; sorkarin RT-PCR khawl a lei duh lo chu an in­thlahdah lutuk vang nge, a ngaihna an hriat loh vang, tih an zawt a ni.

Mizoram BJP chuan, mimalin RT-PCR khawl leina an thawh theih laiin MNF sorkarin tun thlengin khawl a la lei lo a, pahnih a hawh mek tih sawiin, "Tun thlengin Mizoram sorkarin RT-PCR khawl lei a tum thâwm kan hre lo mai ni loin, mau chi supply tur atan cheng 90 lai a ruahman leh si a ni," an ti a; Chief Minister-in, 'Budget hi kan bai thei a, kan kang thei' a tih tawh angin, Covid-19 dona atana mamawh RT-PCR lei nan sum hmang turin Mizoram sorkar an ngen a ni.